(ચંદ્રાવળા)

મારગડો બહુ ઝાડે શોભે, વડ પીપળને સાગ;

જમરૂખડી જાંબુડી મહૂડાં આંબા જાગે જાગ;

આંબા જાગે જાગ તે આવે, છાયાનું સુખ લે જન ભાવે;

કેળ ભણી મન વળતું લોભે,–મારગ. વડ...

વળી કરમદી બોરડી બાવળ, કાંટાસરિયા હોય;

થુએરિયા ઝુમર જેવા ને, ઊંટકટા ફૂલ સહોય;

ઊંટકટા ફૂલ સહોય છે પીળાં, ખેતર તો દીસે બહુ લીલાં;

શાળ નાગલી છતમાં આવળ,—વળી. કાં...

ઉપરથી વરસે મેહ ભારી, ઝાડ તળે પશુ જાય;

ભેંસ ગાય બકરાં ને ઘોડાં, બહુ દૂબળાં દેખાય;

બહુ દુબળાં દેખાય પણ સારાં, કામ કરે પહાડે વસનારાં;

ઘૂંગટીમાં લપટાય રબારી, —ઉપરથી... ઝા....

ચઢ્યા એક ડુંગર કે આવે, બહુ મોટું મેદાન;

જેની પણ ચોપાસે ડુંગર, ઝાડવનાનું રાન;

ઝાડવનાનું રાન છે જાંહે, શાળ તણાં ખેતર કો તાંહે;

ઝરણે વહેતાં તે મન ભાવે,—ચઢયા... બહુ...

એવાં મેદાનો, છે ક્રમમાં, કહું આશરે સાત;

એકલડો શૂરો પણ હબકે, કાયરની શી વાત;

કાયરની શી વાત કહું જ્યારે, થાય વીજ ગગડાટો ત્યારે;

તપસી રહે આનંદી ધૂનમાં,—એવાં... કહું...

સૂર્ય અસ્ત થવાની વેળા, તડકો કુમળો થાય;

બહુ મોટી લીલી ચકચકતી, જાજમ તે પથરાય;

જાજમ તે પથરાય મેદાને, લીલા ના વરણાએ પાને;

સમી જાય સંસારી વેલા,–સૂર્ય... તડ...

લીલું ઘાસ ઊગેલું તેથી, ડુંગર દૂર શોભાય;

મેથીની ભાજીનાં તાબૂત, એ ઉપમા અપાય;

એ ઉપમા અપાય બહુ સારી, કો નગ પર લહેરિયાં ભારી;

લીલા ખીલી ઊંચી હેઠી,—લીલું... ડુંગ...

ત્ર્યંબકના પહાડોમાં ભમતાં, જે છે બહુ વિખ્યાત;

બ્રહ્મ તણી લીલાનાં દર્શન, થયાં શુભ સાક્ષાત;

થયાં શુભ સાક્ષાદાનંદે, કહે નર્મદ ચંદ્રાવળછંદે;

ભૂખ તરસ લેશ ન કો દમતાં,—ત્ર્યંબ... જેછે...