મર્દ

મર્દ

(રોળાવૃત્ત)

મર્દ તેહનું નામ, સમો આવ્યો કે ચાલે;

કનક કામિની તજી, સજી રણમાં જઈ મા'લે.

મર્દ તેહનું નામ, ડરે નહિ રણે જવાથી;

હોંસે ચડે તોખાર, ડગે નહિ રિપુ મળ્યાથી.

મર્દ તેહનું નામ, મરે પણ પણ નવ મૂકે;

ધીર ધરી શૂરભેર, તાક્યું નિશાન ન ચૂકે.

મર્દ તેહનું નામ, સિંગથી શૂર વધારે;

તો૫ ભડાકા કરે, તેમ તે ધસે પુકારે.

મર્દ તેહનું નામ, ચળકતાં શસ્ત્રો જોઈ;

ઊછળી કરતો હાથ, કીર્તિ ઊજળી પર મોહી.

મર્દ તેહનું નામ, લોહીની નદીઓ દેખી;

ધડ માથાને હાડ, કાંપતો નહિ જે ટેકી.

મર્દ તેહનું નામ, સાથી સામું નવ જોએ;

જુક્તિ સાથ બળથકી, લડતો રૂડો સોહે.

મર્દ તેહનું નામ, રડે નહિ ઘાવ લીધાથી;

પડ્યો પડ્યો પણ કહે, કાઢ શત્રુને હ્યાંથી.

મર્દ તેહનું નામ, ભોગવે શ્રમે રળેલું;

સિંહ સરીખો તેહ, ખાય નહિ ઘાસ પડેલું.

મર્દ તેહનું નામ, દેશી સારુ લડી મરતો;

જુગ જુગ જાગે જાગ, નામ પોતાનું કરતો.

mard