મચ્છુ

મચ્છુ

(મિશ્રોપજાતિ)

પ્રકાશની પાંખડીઓ કરે ધરી

અનિલ જ્યારે કિરણો પ્રસારતો;

ગૂંથી કરે આંગળીઓ અનેકની

હું ખેલવા નિત્ય નદીતટે જતો.

ત્યાં હાથીઓના પરિવાર જેવી

સેના પડી પથ્થર કાળમીંઢની;

એમાં તરે નિત્ય નવાં નવાં રૂપે

મચ્છુતણી મોહક નીરચુંદડી.

એ ચુંદડી, મંદિર એકલિંગનું

ને પથ્થરે પથ્થરને પિછાનતો,

વર્ષો તણાં અંતરને વટાવી

ખોવાયેલું અંતર આજ શોધતો.

ભેટી પડું પથ્થરની જમાતને

સ્મરી સ્મરી સ્વચ્છ કરું પ્રભાતને.

machchhu