રેખ્તા
હિન્દવી
સૂફીનામા
રાજસ્થાની
ખર્યા પાનમાં મધુમાસ
Kharya Paan Ma Madhumas
ભાનુપ્રસાદ પંડ્યા
ભાનુપ્રસાદ પંડ્યા
પોપટના પેટ જેવું કમળનું પાન લઈ
શકુંતલા ચીતરતી ગઈ કોઈ યાદ.
ત્યારથી આ તારી મારી જેવાની વચાળ
લીલાં પાન જેવા ખત પરે આલેખાતી વાત.
પાનખર કરે ખખડાટ એના જવાબમાં
તને મને તરુ જેમ ફૂટ્યા કર્યાં પાન.
સીમાડાના ધૂળભર્યા માર્ગે ખોવાઈ તું
વીણ્યાં કર્યાં પાછળ મેં પગલાંનાં પાન!
એક એક પાન વાંચ્યે ઊકલતો જાય, સખી!
આપણો એ અટવીની જેવો ઇતિહાસ.
શિશિરના વાયરે એ ઊડતી પીળાશ ન્હોય
જોનારાને જડે તહીં સુંવાળી લીલાશ.
ખરી પડ્યાં પાન સમાં ભેળાં કરી ખત સહુ
વચ્ચે બેસું-અકાળે ત્યાં ખીલે મધુમાસ!
સ્રોત
- પુસ્તક : કવિતા - સપ્ટે.-ઑક્ટો., 2017 (પૃષ્ઠ ક્રમાંક 46)
- સંપાદક : રમેશ પુરોહિત
- પ્રકાશક : જન્મભૂમિ પ્રકાશન, મુંબઈ