કાર્તિક માસ

કાર્તિક માસ

(ઉપજાતિ વૃત્ત)

અહો જુઓ આ વછિયાત એક,

લાવ્યો દિસે અન્ન ભરી અનેક;

છએ ઋતુનું પય હોય ધાવ્યો,

એવો જુઓ કાર્તિક માસ આવ્યો.

સેના સજે ભૂપતિ ઠામ ઠામ,

ગ્રામાંતરે જૈ કરવા મુકામ;

સેનાપતીનું પદ હોય લાવ્યો,

એવો જુઓ કાર્તિક માસ આવ્યો.

વિશ્રામના માસ વિતી ગયા છે,

ઉદ્યોગના માસ હવે થયા છે;

શિશુપણાના દિન જેમ જાય,

ઉદ્યોગને યોગ્ય જુવાન થાય.

ખેડૂજનો જો કણ ઊપણે છે,

છોડાં અને અન્ન જુદાં પડે છે;

સંગ્રામનો સંચર જેમ થાય,

શૂરા રહે કાયર દૂર જાય.

એવી રીતે કાર્તિક તો સિધાવ્યો,

હવે જુઓ આ મૃગશીર્ષ આવ્યો;

જો ધામ સૂર્યે ધનુ રાશિ ધાર્યું,

જાણે ધર્યું ચાપ શિકાર સારુ.

રાત્રી વધી લાંબી ઘણી જણાય,

જો છેક ટુંકું દિનમાન થાય;

કોઈ સમે જેમ ઘટે સુધર્મ,

વળી વધી જાય અધર્મ કર્મ.

સીતાફળીના ફળ ખૂબ પાક્યાં,

લેતાં વિણીને જન જૂથ થાક્યાં;

જાણે શિયાળો પરદેશી આવ્યો,

મનુષ્ય માટે ફળ મિષ્ટ લાવ્યો.

Kartik Maas