રેખ્તા
હિન્દવી
સૂફીનામા
રાજસ્થાની
હૃદયકમળની જૂઠી આશા
hridaykamal ni juthi aash
કલાપી
કલાપી
રે ભોળી! જલઝૂલતી કમલિની! કાં ભૂલ? વ્હાલી સખી,
જોઈ પૂર્વદિશામુખે પ્રસરતી લાલાશ આ ઊજળી?
આશા વ્યર્થ ધરે રવિ-સુકરની સંધ્યા સમે, બાપલા!
એ તો હિમપતિ શશી નીકળશે, ના ના પતિ હે હલા!
આ પોચું દિલ તું સમું સુમન છે, તેણે ગ્રહી આશ'તી,
જાણ્યું સૂર્ય થઈ પ્રફુલ્લ કરશે પ્રેમી તણી પ્રીતડી;
ના તે તે નીકળી હતી શશી સમી, હિમે હણ્યું કાળજું,
જૂઠી આશ દઝાડતી સુમનને, ભૂલે ન તે ઝાળ તું!
સ્રોત
- પુસ્તક : કલાપીનો કાવ્યકલાપ (પૃષ્ઠ ક્રમાંક 5)
- સંપાદક : અનંતરાય મ. રાવળ
- પ્રકાશક : ગૂર્જર ગ્રંથરત્ન કાર્યાલય, અમદાવાદ
- વર્ષ : 2004