ફૂલ્યો માઘ સરસ જ્યાં ફાગણ

(ચંદ્રાવળા છંદ)

ફૂલ્યો માઘ સ૨સ જ્યાં ફાગણ, ફુલી ગાજે ફાગ;

પણ ડહાપણ આપણમાં આવે, રસિક સુણીને રાગ;

રસિક સુણિને રાગ રૂપાળો, કોમળ થાય સ્વભાવ કૃપાળો;

એજ અરથ ગાજે ઘર આંગણ,

ફૂલ્યો માઘ સરસ જ્યાં ફાગણ.

ભોળી દુનિયાં હોળી ટાણે, ઝોળીમાં ધરિ ધૂળ;

ટોળી મળી તોફાન કરે છે, મૂર્ખાઈનું એ મૂળ;

મૂર્ખાઈનું એ મૂળજ મોટું, ખાનદાન થઈ ઉચરે ખોટું;

ઘાયલ થઈ ઘે૨ ડોળી આણે,

ભોળી દુનિયાં હોળી ટાણે.

મગરમસ્ત થઈ વગર વિચારી, બોલીશ હલકા બોલ;

ગણશે ગુણી ન૨ નારિ નઠારો, તારો ઘટશે તોલ;

તારો ઘટશે તોલ તતક્ષણ, વળી તું નહિ કહેવાય વિચક્ષણ;

લાજ તજી નહિ કરીશ લવારી,

મગરમસ્ત થઈ વગર વિચારી.

કોકિલ કાક તણા વસી કુળમાં, કથન કથે નહિ કદીએ ક્રૂર;

હંસ વસી બકવંશ વિષે નહિ, જળચર ભ્રખે જરૂર;

જળચર ભ્રખે જરૂર ન જાણી, પંડિત દે દૃષ્ટાંત પ્રમાણી;

નિર્લજ વચન ન લે મુખ મુળમાં;

કોકિલ કાકતણા વસી કુળમાં.

રસપ્રદ તથ્યો

ડોળી = ટોળી (પાં.આ.) ભ્રખે = ભરખે

Fulyo Magh Saras Jya Fagan