ચિર વિષાદ ભર્યો

ચિર વિષાદ ભર્યો

ચિર વિષાદ ભર્યો નયનો મહીં

તૃણ સમું હળવું ઉર શેં થશે?

ઉદધિ-મર્મરમાં ભૂલવું બધું;

પ્રણય! જા, સઘળું સળગી ગયું...

કટક જીવનમાં સ્મરનું લઈ

પ્રણય એક જ વેળ પધારજે,

જીવનમાં ફરી એમ તું આવતાં

હર થઈ દહવો, થવું ખાક વા.

ફક્ત એક જ ફાગણ માસમાં

ભભકમાં સળગે અહીં કેસૂડો;

પ્રણય, એમ જ તું વિજયી થજે

ફક્ત યૌવનની જ વસંતમાં–

ફરી પધારવું હોય, પધારજે

પ્રણય, તું અતિથિ લઈ આવજે —

ઇશૂની જનની જેવી મોક્ષદા માત લાવજે,

દાન્તેની મુક્તિદા જેવી લાવજે વા બિયાટ્રિસ.

Chir Vishad Bharyo