(ભુજંગી છંદ)

લીલાં ચીર ચોખાં ધર્યાં આપ અંગે,

જુઓ જાણિયે જે ભરાણી ઉમંગે;

રસીલી રચ્યો વેષ રૂડો રૂપાળો,

ભલી ભૂમિકા ભામિની રૂપ ભાળો.

છવાઈ રહ્યા અન્ના છોડ છાજે,

રુડી રીત રોમાવળી જેમ રાજે;

નિધી નીરનો નાભિ જેવો નિહાળો,

ભલી ભૂમિકા ભામિની રૂપ ભાળો.

ભલો ઠામ ઠામે દિસે ભેજ કેવો,

વળ્યો જાણીયે પંડ માંહી પ્રસેવો;

નદી નીર રેલા તણો છે ઉછાળો,

ભલી ભૂમિકા ભામિની રૂપ ભાળો.

ફુલ્યાં ફુલના ઝાડના ક્યારડા છે,

ધર્યા જાણીએ હોંશથી હારડા છે;

મણિ શ્વેત માળા સમાને મરાળો,

ભલી ભૂમિકા ભામિની રૂપ ભાળો.

રુડા મોરના શોર શા હું વખાણું,

સતી જાણીએ ગાય છે શુદ્ધ ગાણું;

રુડો કંથ દેખી દિલેથી ઉછાળો,

ભલી ભૂમિકા ભામિની રૂપ ભાળો.

ગિરી શીખરે વાદળાંની ઘટા છે,

છુટેલા ભલા ચોટલાની છટા છે;

લઘુ પર્વતો ને ધરે કુચ ઢાળો,

ભલી ભૂમિકા ભામિની રૂપ ભાળો.

ધ્વજા દેવળો ઉપરે ખેલ ખેલે,

છબીલી છુટા છેડલા જેમ મેલે;

જુઓ હેમનો કુંભ ત્યાં જુક્તિવાળો

ભલી ભૂમિકા ભામિની રૂપ ભાળો.

થઈ ધૂળ ધોવાઈને સ્વચ્છ સારી,

કરી સ્નાન જાણે બની શુદ્ધ નારી;

ઝગે છીપ જાણે કરે ચક્ષુ ચાળો,

ભલી ભૂમિકા ભામિની રૂપ ભાળો.

ચહુ પાસ પંખી ઉડે આસપાસે,

ભલો ગંધ લેવા ભમ્યા ભ્રંગ ભાસે;

વિશેષે દિસે વેષ રૂપે રસાળો,

ભલી ભૂમિકા ભામિની રૂપ ભાળો.

રવી અસ્ત ટાણે મળી જુક્તિ મોટી,

ધરી જાણીએ કાનમાં બે અકોટી;

ધર્યો સાડલો રંગ રાતે પનાળો,

ભલી ભૂમિકા ભામિની રૂપ ભાળો.

પતી મેઘ આકાશ ચોપાસ આવ્યો,

મણી મોતી તે કેટલાંએક લાવ્યો;

સતીનો થયો દેહ દેખી સુખાળો,

ભલી ભૂમિકા ભામિની રૂપ ભાળો.

પતી મેઘરાજાતણો પામી પ્યાર,

સજવ્યા પતીદેવ શૃંગાર સાર;

પુરો હર્ષ પામી પ્રિયા પૃથ્વિ નામે,

દિઠી દેવી જેવી જ દલપત્તરામે.