અવતરણ

અવતરણ

(તોટક)

રમતાં ભરતાં કદી દિવ્ય વને,

ફૂલડાં જડિયાં રૂડલાં મુજને,

બહુ વેળ રહ્યાં પડી મુજ કને,

ગૂંથી આજ દઉં રસિકો! તમને.

બહુ વેળ રહ્યાં પણ દિવ્ય બધાં,

ન ગયાં કરમાઈ, ખીલ્યાં બમણાં,

સહુ તેતણી આજ વિવેકગુણે,

ગૂંથી માળ દઉં રસિકો તમને.

મૃદુ ગન્ધ મનોહર કોઈ વિશે,

વળી ઉત્કટ ગન્ધ બીજે વિલસે,

વળી કોમહીં ગન્ધ ગભીર સૂએ,

ગણિયા નહીં જાય અહીં સહુએ.

વળી રંગ અનેક ઝીણા, કુમળા,

વળી દીપ્ત, ગભીર, અને વિમળા,

રમતા વિવિધે ફૂલડે સઘળા,

મળી નેન દીએ સુખ તે રસીલા.

ઋતુ સર્વતણાં ફૂલડાં ખીલિયાં,

તહીં એક સમે સઘળાં મળિયાં,

સહુ તેહની માળ વિવેકગુણે,

રસિકો! ગૂંથી આજ દઉં તમને.

સહુ રંગ ભળે અનુકૂળ રીતે,

વળી ગન્ધવિરોધ કહીં ન પીડે,

ત્યમ એ કુસુમોતણી આજ દિને

ગૂંથી માળ દઉં રસિકો! તમને.

avataran