(ઝૂલણા છંદ)

આજ આકાશ મંડળ દિસે ઓપતું, ભૂમિ મંડળ વળી સરસ ભાળ્યું;

રાજ મંડળ વળી રાજ દરબારમાં, ભભકતું આજ અતિશે નિહાળ્યું;

લહરિ આનંદની આજ ત્રણ લોકમાં, જાણિયે રાજનું તેજ ખૂલ્યું;

સરસ શોભા ઘણી કેની હું વર્ણવું. એકની નિરખતાં એક ભૂલું.

આજ આ શેહેરમાં સરસ રચના રચી, અવનીમાં જેમ વૈકુંઠ આવ્યું;

ધન્ય સાબરમતી નીર નિરમળ વહે, ધન્ય શ્રીનગર ભૂપે ભજાવ્યું;

દીપમાળા ભલી ઠામ ઠામે દિસે, લક્ષમાં લાવતાં ચિત્તે લોભે;

વાવટાની છબી શી કહું વર્ણવી, મેઘના ધનુષ સમ સરસ શોભે.

*

હાર હીરા મણી રચિત હઈયે ધર્યા, ખૂંપ હીરાતણા શીશ શોભે;

લટકતાં લૂમખાં હોય હીરાતણાં, નિરખવા સ્થિર થઈ લોક થોભે;

દ્વાર કેરી કમાનો દિવાથી ભરી, દેવિયે દામણી જેમ બાંધી;

દીપકો કમળ આકાર બે બાજૂએ, શ્રવણમાં ઝાલ બે જેમ સાંધી.

*

ત્યાં પતાકા ધજા તોરણો બાંધિયાં, બે ફુવારા દિસે કલશ થાપ્યા;

દીવડાં શીવડાં રત્ન દીપક રચી, દીપ દીક્પાળને જેમ આપ્યા;

જાણિયે એજ જળપ્રલયના સમયનું, મનુતણું નાવ ઘસડાઈ આવ્યું;

પક્ષી પશુ ઝાડ વળી સપ્તરૂષિ સહિતને, પ્રલયથકી હોય ઉગારી લાવ્યું.

સ્થીર છે ઝાડ કે તે કુવાથંભ છે, વાવટા શઢ બન્યા સરસ તેમાં;

છે રૂડાં શિખરો સરસ સુકાન સમ, દીપમણિ માળ છે માલ જેમાં;

રક્ત ને પીત લીલા રૂડા રંગની, ત્યાં પડે છે પ્રભા દીપ કેરી;

જેમ ભાનુતણાં કિર્ણના ભાસથી, ઇંદ્રધનુ કાંતિ ઉપજે ઘણેરી.

*

ચળકતી સરસ ચૌટા અને ચોકમાં, દેખીયે દીપતી દીપમાળા;

જાણિયે ધરણિયે અંગપર ધારિયા, હાર હીરામણીના રૂપાળા;

રાશિ નક્ષત્રનાં ચિત્ર રળિયામણાં, ઈશ્વરે આભમાં જેમ કીધાં;

તેમ દીપાવડી દીપમાળાતણાં, ચિત્ર વિચિત્ર શોભાવિ દીધાં.

*

કે ભલિ ભૂમિયે નેત્ર લાખો કર્યાં, નિરખવા આજ આનંદ આવો;

કે રૂડો રત્નભંડા૨ આ ઉઘડ્યો, આપવા લોકને સરસ લાવો;

કે પૂરા પુન્યથી આજ પૃથ્વી વિશે, મણિતણો અધિક વર્ષાદ વર્શ્યો;

દીપમાળા તણો સરસ દેખાવ તે, કવિતણે દીલ એવોજ દર્શ્યો.

*

પુત્રનું પ્રેમથી માત પાલન કરે, આપણું હિત સદા એમ કરશે;

વિવિધ વિદ્યાતણી ખૂબ વૃદ્ધિ કરી, હેતથી હરકતો સર્વ હરશે;

દેશીને શ્રેષ્ઠ અધિકાર તે આપશે, પૂરશે આશ સૌ રૂડી રાણી;

ખૂબ દિલ ખુશિ થઈ બહુ સ્વરે બોલજો, સજ્જનો સર્વ જયકાર વાણી.