rani sonandenun marashiyun - Marasiya | RekhtaGujarati

રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો
search search
લૉગ-ઇન

રાણી સોનાંદેનું મરશિયું

rani sonandenun marashiyun

રમેશ પારેખ રમેશ પારેખ
રાણી સોનાંદેનું મરશિયું
રમેશ પારેખ

તમને

મારા લોહીમાં લીલું રમતા ઝામણ નાગ,

વળાવું તમને...

મારી મેડીયું તમે ઊતરો

મારું ફળિયું તમે ઊતરો

મારી શેરીયું તમે ઊતરો

મારી દામણીના, ખમકાર!

હો મારી ચૂડીયુંના ખમકાર!

હો મારા અળતાના ખમકાર!

હો ખાલી વળતાના ખમકાર!

છાતીના મોરને લેતા જાવ

છાતીના મોરને લેતા જાવ

રે, ભોરિંગ જાવ

રે, ભોરિંગ જાવ...

તમારા રાફડા હવે પૂરમાં ડૂબે

રાફડા તમે ડૂબતા મૂકી પૂરમાં ભોરિંગ, જાવ...

રે તમે નાગમતીમાં રમતા

તમે હાથમતીમાં રમતા

મારી શેરીએ લીલું રમતા

મારા ફળિયે લીલું રમતા

મારી મેડીએ લીલું રમતા

મારા લોહીમાં લીલું રમતા તમે રમતા

હવે રમશે

કાળુંઝેર અંધારું

સાવ ઉઘાડા રાફડા હડોહડ કડાકા મારશે કાલે આંખમાં

કાલે

સાવ રે નીંભર પોપચાં હડોહડ કડાકા મારશે

ધડૂસ

હાય રે, મારા લોહીમાં લીલું રમતા ઝામણ નાગ,

વળાવું તમને

હાલરહીંચકે ખાલી ચડશે

તોરણચાકળે ખાલી ચડશે

રામણદીવડે ખાલી ચડશે

મારે આભલે ખાલી ચડશે

હાલરહીંચકે ખાલી ચડશે તારી

પૂછશે કડાં

પૂછશે ભીંતો

પૂછશે મેડી

ઢોલિયા સીસમસાગના મને પૂછશે

ચંદણચોકમાં ઘેરી પૂછશે

વેરી,

મારગે મને પૂછશે

લીલાં ઝાડવાં ખેતર સીમ કે પાણીશેરડા

વાવડ પૂછશે

ધડૂસ

પૂછશે

ધડૂસ

પૂછશે

ધડૂસ

કેડીએ મારા ધ્રસકી જાશે પગ

ને રગેરગ માલીપા કાચની જેવું તૂટશે

પછી.

ઘરથી ખેતર

ઘરથી ખેતર

ઘરથી ખેતર

ઘરથી ખેતર

ઘરથી ખેતર કેડીઓ ક્યાંથી ખૂટશે

ભોરિંગ કેડીઓ ક્યાંથી ખૂટશે

મારી કેડીઓ કેદી ખૂટશે

મારી આંખના ઢોળાવ ઊતરો

મારા લોહીના ઢોળાવ ઊતરો

મારા જીવના ઢોળાવ ઊતરો

મારા જીવમાં લીલું રમતા ઝામણ નાગ,

વળાવું તમને

મારા જીવમાં લીલું રમતા ઝામણ નાગ,

વળાવું તમને

ધડૂસ...

તમને

ધડૂસ...

તમને

ધડૂસ...

ધડૂસ...

ધડૂસ...

ધડૂસ...

સ્રોત

  • પુસ્તક : વીસમી સદીની ગુજરાતી કાવ્યમુદ્રા (પૃષ્ઠ ક્રમાંક 531)
  • સંપાદક : ચંદ્રકાન્ત શેઠ, યોગેશ જોષી, હર્ષ બ્રહ્મભટ્ટ, ઊર્મિલા ઠાકર
  • પ્રકાશક : ગૂર્જર ગ્રંથરત્ન કાર્યાલય
  • વર્ષ : 2007