રેખ્તા
હિન્દવી
સૂફીનામા
રાજસ્થાની
ઉમળકાનું મરસિયું
umalkanun marashiyun
પારુલ ખખ્ખર
પારુલ ખખ્ખર
કાળની તલવાર્યું વીંઝાય... મર્યો રે હાય.. ઉમળકો!
પારુલદે મરસિયાં ગાય... મર્યો રે હાય... ઉમળકો!
રાત’દી વીનવું અલ્લા પીર... ખમ્મા
ઉમળકો રે’જો રણમાં થીર... ખમ્મા
ઉમળકે ઝીલ્યાં તાતાતીર... ખમ્મા
ઉમળકો તોય મર્યો ભડવીર... ખમ્મા
ઓરતા રહ રહ રોતા જાય... મર્યો રે હાય.... ઉમળકો!
પારુલદે મરસિયાં ગાય... મર્યો રે હાય... ઉમળકો!
હતો એ ભડભાદરને ધીર... જીવલા
હતો એ જગ આખ્ખાનો મીર.... જીવલા
હતો એ નરબંકો શૂરવીર... જીવલા
ઘવાયો તેમ છતાં ગંભીર... જીવલા
કાગડા ઠોલીઠોલી ખાય... મર્યો રે હાય... ઉમળકો!
પારુલદે મરસિયાં ગાય... મર્યો રે હાય... ઉમળકો!
લઈ જા આંખલડીનું હીર... ગીધડા
લઈ જા મેલુંઘેલું લીર... ગીધડા
લઈ જા શીરો, પૂરી, ખીર... ગીધડા
લઈ જા ઠામૂકું મંદિર... ગીધડા
ચોકમાં ગીતાજી વંચાય... મર્યો રે હાય... ઉમળકો!
પારુલદે મરસિયાં ગાય... મર્યો રે હાય... ઉમળકો!
સ્રોત
- પુસ્તક : કરિયાવરમાં કાગળ (પૃષ્ઠ ક્રમાંક 83)
- સર્જક : પારુલ ખખ્ખર
- પ્રકાશક : પોતે
- વર્ષ : 2021