રેખ્તા
હિન્દવી
સૂફીનામા
રાજસ્થાની
વેણુ વસંતની વાગતા
wenu wasantni wagta
વેણુ વસંતની વાગતા
wenu wasantni wagta
મારે ડુંગરિયે ડોલ્યા મોર રે;
કાનજી! મારે ઘેર આવો ને!
આંબાની ડાળે ઓલી બોલી કોયલડી,
કાંપે કાળજડાંની કોર રે; કાનજી!
આવ્યાની અવધ્યું આવી ગઈ,
તો ય આવ્યો ન ચિત્તડાનો ચોર રે; કાનજી!
હાલી ગઈ મીઠી માઝમ રાત્યું,
આવ્યા વિજોગના પોર રે; કાનજી!
ગોકુળ ગામની ગલીએ ગલીએ,
ગોતું હું આઠે પહોર રે; કાનજી!
તમારો કાનુડો કાળો, જશોદાજી!
તમારો કાનુડો ચોર રે; કાનજી!
તમારા કાનજી ભલે, રાધારાણી!
અમારા જીવન ઘેર રે; કાનજી!
મેણાં ટોણાં મારી રીઝાવું કાનજી,
હૈયાના મોર ચકોર રે; કાનજી!
સ્રોત
- પુસ્તક : ગુજરાતી લોકસાહિત્યમાળા – મણકો– ૭ (પૃષ્ઠ ક્રમાંક 109)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસાઈ, પી. સી. પરીખ, વસંત જોધાણી)
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968