રેખ્તા
હિન્દવી
સૂફીનામા
રાજસ્થાની
વયનું કજોડું
wayanun kajoDun
બાર વરસની કન્યા ને અઢી વરસનો વર રે—
પાણી ભરવા જાઉં ત્યારે વાંસે વાંસે આવે રે :
વાંસે વાંસે આવે ત્યારે કૂવામાં હડસેલું રે :
કૂવામાં હડસેલું ત્યારે ડુબક ડોઈયાં કરે રે :
ડુબક ડોઈયાં કરે ત્યારે હૈયડલામાં દાઝું રે :
હૈયડલામાં દાઝું ત્યારે માણ લંબાવું રે :
માણ લંબાવું ત્યારે કાને લગી આવે રે—બાર વરસની કન્યા.
વાસીદાં વાળવા જાઉં ત્યારે વાંસે વાંસે આવે રે :
વાંસે વાંસે આવે ત્યારે, ઊકરડામાં દાબું રે :
ઊકરડામાં દાબું ત્યારે કુદલક કુદલક કરે રે :
કુદલક કુદલક કરે ત્યાંરે હૈયડલામાં દાઝું રે :
હૈયડલામાં દાઝું ત્યારે ટોપલો લંબાવું રે :
ટોપલો લંબાવું ત્યારે કાને વળગી આવે રે—બાર વરસની કન્યા.
રોટલા કરવા બેસું ત્યારે ચૂલા કને આવે રે :
ચૂલા કને આવે ત્યારે ઊંબાડું દેખાડું રે :
ઊંબાડું દેખાડું ત્યારે દબડક દબડક નાસે રે :
દબડક દબડક નાસે ત્યારે ટોડલે જઈને ઊભે રે :
ટોડલે જઈને ઊભે ત્યારે, ચીસ પાડી રડે રે :
ચીસ પાડી રડે ત્યારે હૈયડલામાં દાઝું રે :
હૈયડલામાં દાઝું ત્યારે કટકો રોટલો આપું રે :
કટકો રોટલો આપું ત્યારે છેલ્લો રોટલો માગે રે :
છેલ્લો રોટલો આપું ત્યારે શીકા સામું જુએ રે :
શીકા સામું જુએ ત્યારે શીકાવાળું આપું રે—
બાર વરસની કન્યા ને અઢી વરસનો વર રે?
સ્રોત
- પુસ્તક : ગુજરાતી લોકસાહિત્યમાળા – મણકો– ૩ (પૃષ્ઠ ક્રમાંક 81)
- સંપાદક : ગુજરાત લોકસાહિત્ય સમિતિ (ધૂમકેતુ, પુષ્કર ચંદરવાકર, સુધા દેસાઇ, મંજુલાલ ર. મજમૂદાર, મધુભાઈ પટેલ, લાલચંદ ધૂળાભાઈ નીનામા, કનૈયાલાલ જોશી.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1963