રેખ્તા
હિન્દવી
સૂફીનામા
રાજસ્થાની
બોલે છે મોર
bole chhe mor
કારી કારી વાદળીમાં વીજરી ઝબુકે,
મહેલિયો ઘમઘોર, બરડામાં બોલે છે મોર;
ઝુમણાંનો ઘડનાર ગ્યો છે પરદેશમાં,
કાંઠલીની બે બે જોડ, બરડામાં બોલે છે મોર.
કારી કારી વાદળીમાં વીજરી ઝબુકે,
મેહુલિયો ઘમઘોર, બરડામાં બોલે છે મોર;
કડલાંનો ઘડનાર ગ્યો છે પરદેશમાં,
કાંબડીની બે બે જોડ, બરડામાં બોલે છે મોર.
કારી કારી વાદળીમાં વીજરી ઝબુકે,
મેહુલિયો ઘમઘોર, બરડામાં બોલે છે મોર;
ચુડલાનો ઘડનાર ગ્યો છે પરદેશમાં,
બંગડીની બે બે જોડ, બરડામાં બોલે છે મોર.
કારી કારી વાદળીમાં વીજરી ઝબુકે,
મેહુલિયો ઘમઘોર, બરડામાં બોલે છે મોર;
નથડીનો ઘડનાર ગ્યો છે પરદેશમાં,
ટીલડીની બે બે જોડ, બરડામાં બોલે છે મોર;
કારી કારી વાદળીમાં વીજરી ઝબુકે,
મેહુલિયો ઘમઘોર, બરડામાં બોલે છે મોર;
ચુંદડીનો વોરનાર ગ્યો છે પરદેશમાં,
ઓઢણીને બે બે જોડ, બરડામાં બોલે છે મોર.
સહ સંપાદક હરિલાલ. કા. મોઢાની નોંધ :અગાઉ મેં મોકલેલ ગીત ‘કારાં કારાં છે ડુંગરાનાં પાણી, ઘડુલિયો ઘૂમે છે’ એ જ ઢાળનું અને મળતું આવતું આ ગીત સ્થળભેદથી આખું બીજું ગીત બની ગયું છે. પ્રદેશ પ્રદેશના ભેદે લોકસાહિત્યનું પણ થોડું થોડું રૂપ બદલાય છે. તેના નમૂનારૂપ આ ગીત છે.
સ્રોત
- પુસ્તક : ગુજરાતી લોકસાહિત્યમાળા – મણકો– 7 (પૃષ્ઠ ક્રમાંક 50)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસાઈ, પી. સી. પરીખ. હરિલાલ કા. મોઢા.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968