રેખ્તા
હિન્દવી
સૂફીનામા
રાજસ્થાની
બાજરિયે રઢો લાગી
bajariye raDho lagi
બાજરિયે રઢો લાગી રે, ભવાનપોરનું બાજરિયું.
મારા ગામના કુંભારી રે! વીરા તમને વેંધવું;
મારો ગરબો ભલેરો લાવો રે! ભવાનપોરનું.
બાજરિયે રઢો લાગી રે, ભવાનપોરનું બાજરિયું.
મારા ગામના સુતારી રે! વીરા તમને વેંધવું;
મારો ગરબો ભલેરો કોરી આલો રે! ભવાનપોરનું.
મારા ગામના લવારી રે! વીરા તમને વેંધવું;
મારો ગરબો ભલેરો જડી આલો રે! ભવાનપોરનું.
મારા ગામના પેંજારી રે! વીરા તમને વેંધવું;
મારા ગરબે દિવેટો લાવો રે! ભવાનપોરનું.
મારા ગામના ઘાંચીડા રે! વીરા તમને વેંધવું;
મારા ગરબે તેલડાં લાવો રે! ભવાનપોરનું.
મારા ગામના પટોલી રે! દાદા તમને વેંધવું;
મારા ગરબે ચોચીઓ મેલાવો રે! ભવાનપોરનું.
મારા ગામના ઘૈડેરા રે! દાદા તમને વેંધવું;
મારો ગરબો ભલેરો વખાણો રે! ભવાનપોરનું.
મારા ગામની દીચરીઓ રે! વીરા તમને વેંધવું;
મારો ગરબો ભલેરો ગવરાવો રે! ભવાનપોરનું.
મારા ગામની વહુવારુ ભાંજઈ તમને વેંધવું;
મારો ગરબો ભલેરો રમાડો રે! ભવાન પોરનું.
મારા ગામના મોટિયાળા રે! વીરા તમને વેંધવું;
મારો ગરબો ભલેરો ઓળાવો રે! ભવાનપોરનું.
સ્રોત
- પુસ્તક : ગુજરાતી લોકસાહિત્યમાળા – મણકો–1 (પૃષ્ઠ ક્રમાંક 266)
- સંપાદક : ગુજરાત લોકસાહિત્ય સમિતિ (ઉમાશંકર જોશી, પુષ્કર ચંદરવાકર, સુધા દેસાઇ, મંજુલાલ ર. મજમૂદાર, મધુભાઈ પટેલ, લાલચંદ ધૂળાભાઈ નીનામા, માધવ મો. ચૌધરી
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1957