રેખ્તા
હિન્દવી
સૂફીનામા
રાજસ્થાની
ઉભલા રે ગોરી રંગમોલમાં રે
ubhla re gori rangmolman re
ઉભલા રે ગોરી રંગમોલમાં રે, આંગણે ઘોડા હણહણે રે;
માગો માગો મોરી ગોરી, પાછલે પરોડિયે મારે ચાલવું રે.
લાવજો રે સાયબા શીંગારૂ ઘોડા રે, લાવજો રે વણશિંગારો ડોળિયો રે;
લાવજો રે સાયબા પાયારી પાલખી રે, લાવજો વણપાયાનો ઢોલિયો રે.
લાવજો રે સાયબા ચાલંતાં ચીર રે, લાવજો મુખ બોલંતી કાંસકી રે;
લાવજો રે સાયબા કીડીની જીભ રે, લાવજો રે મકોડા દાંતનો ચુડલો રે.
લાવજો રે સાયબા શેરડીનો પોંખ રે, લાવજો રે જાર કેરાં ઝીંડવાં રે;
લાવજો રે સાયબા શોકયુનાં સાલ, લાવજો રે આગમજાયા છોકરાં રે.
ન જડે રે ગોરી મોરી, શીંગારૂં ઘોડા, કે ન જડે વણ શિંગારૂં ડોળિયો રે;
ન જડે રે ગોરી મોરી પાયારી પાલખી, કે ન જડે વણ પાયાનો ઢોલિયો રે.
ન જડે રે ગોરી મોરી, ચાલતાં ચીર, કે ન જડે મુખી બોલંતી કાંસકી રે;
ન જડે રે ગોરી મોરી, કીડીની જીભ, કે ન જડે મકોડા દાંતનો ચુડલો રે.
ન જડે રે ગોરી મોરી, શેરડીનો પોંખ, કે ન જડે જાર કેરાં ઝીંડવાં રે;
જડશે જડશે રે ગોરી, શોક્યુંના સાલ, કે ન જડે આગમજાયાં છોકરાં રે.
સ્રોત
- પુસ્તક : ગુજરાતી લોકસાહિત્યમાળા – મણકો– ૫ (પૃષ્ઠ ક્રમાંક 188)
- સંપાદક : ગુજરાત લોકસાહિત્ય સમિતિ (મંજુલાલ ર. મજમૂદાર, બચુભાઈ રાવત, મનુભાઈ જોધાણી, પદ્મશ્રી દુલાભાઈ કાગ, મેરૂભા ગઢવી, પુષ્કર ચંદરવાકર, ચન્દ્રકાન્ત વાઘેલા, કનૈયાલાલ જોશી, પ્રહ્લાદ ચી. પરીખ, વસંત જોધાણી.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1966