ઊંડો કુવો મસ સાંકડો હો રામ

ઊંડો કુવો મસ સાંકડો હો રામ,

કાંઠે પડિયો વસિયેવ વાગ;

મોરી સૈયરૂંનાં દુખ હરિ જાણજો.

દેરાણી જેઠાણી પાણી સંચર્યાં,

જેઠાણીને ડસિયો કાળો નાગ;

મોરી સંયરૂંનાં દુખ હરિ જાણજો.

દેશ પરદેશના વૈદડા તેડાવો,

એ તો મારી સોનલ બઈને કાજ;

મોરી સૈયરૂંનાં દુખ હરિ જાણજો.

હાથે પગે બાઈને ત્રાજ્વાં હો રાજ (2)

એવાં મારા સોનલ બાઈનાં રૂપ,

મોરી સૈંયરૂંના દુખ હરિ જાણજો.

દેશ પરદેશના સોનીડા તેડાવો (2)

એ તો મારી સોનલ બાઈને કાજ;

મોરી સૈયરૂંનાં દુખ હરિ જાણજો.

ચંદન સુખડનાં લાકડાં મંગાવો (2)

એ તો મારી સોનલ બાઈને કાજ;

મોરી સૈયરૂંનાં દુખ હરિ જાણજો.

રસપ્રદ તથ્યો

દેરાણી અને જેઠાણી ગામને પાદર પાણી ભરવા ગયાં, ત્યાં જેઠાણીને સાપ કરડ્યો; તેનું કરૂણ ગીત માંડળ ગામની તુરી બહેનો પાસેથી મળ્યું છે.

પુસ્તક : ગુજરાતી લોકસાહિત્યમાળા – મણકો– ૫ (પૃષ્ઠ ક્રમાંક 128)
સંપાદક : ગુજરાત લોકસાહિત્ય સમિતિ (મંજુલાલ ર. મજમૂદાર, બચુભાઈ રાવત, મનુભાઈ જોધાણી, પદ્મશ્રી દુલાભાઈ કાગ, મેરૂભા ગઢવી, પુષ્કર ચંદરવાકર, ચન્દ્રકાન્ત વાઘેલા, કનૈયાલાલ જોશી, પ્રહ્લાદ ચી. પરીખ, નિરંજન સરકાર.
પ્રકાશક : ગુજરાત લોકસાહિત્ય સમિતિ, અમદાવાદ
વર્ષ : 1966

unDo kuwo mas sankDo ho ram