રેખ્તા
હિન્દવી
સૂફીનામા
રાજસ્થાની
ટીલડી
tilDi
સવા મણ સોનું ને અધમણ રૂપું
તેની મને ટીલડી ઘડાવી.
ઓ સહિયરો મારી, ટીલડી રે મારી નેણાંમાં રહે છે.
ટીલડી પહેરીને અમે સસરા ઘેર ગ્યા’તાં
સાસુએ મોં મચકોડ્યાં
ઓ સહિયરો મારી, ટીલડી રે મારી નેણાંમાં રહે છે.
કેમ રે સાસુજી તમે મોં મચકોડ્યાં?
મારે બાપે ઘડાવી, મારી માતાએ મઢાવી
તેની મને ટીલડી ઘડાવી.
ઓ સહિયરો મારી, ટીલડી રે મારી નેણાંમાં રહે છે.
ટીલડી પહેરીને અમે જેઠ ઘેર ગ્યાં’તાં
જેઠાણીએ મોં મચકોડ્યાં
ઓ સહિયરો મારી, ટીલડી રે મારી નેણાંમાં રહે છે.
કેમ રે જેઠાણી તમે મોં મચકોડ્યાં?
મારે કાકે ઘડાવી, માર કાકીએ મઢાવી
તેની મને ટીલડી ઘડાવી.
ઓ સહિયરો મારી, ટીલડી રે મારી નેણાંમાં રહે છે.
ટીલડી પહેરીને અમે દિયર ઘેર ગ્યાં’તાં
દેરાણીએ મોં મચકોડ્યાં
ઓ સહિયરો મારી, ટીલડી રે મારી નેણાંમાં રહે છે.
કેમ રે દેરાણી તમે મોં મચકોડ્યાં?
મારે વીરે ઘડાવી, મારી ભોજાઈએ મઢાવી
તેની મને ટીલડી ઘડાવી
ઓ સહિયરો મારી, ટીલડી રે મારી નેણાંમાં રહે છે.
ટીલડી પહેરીને અમે જળ ભરવા ગ્યાં’તાં
ત્યાં તો મને ટીલડી ગમાણી રે
ઓ સહિયરો મારી, ટીલડી રે મારી નેણાંમાં રહે છે.
ગામે ગામના ભોઇયા તેડાવું
જળમાં જાળીઓ મેલાવું
ઓ સહિયરો મારી, ટીલડી રે મારી નેણાંમાં રહે છે.
ટીલડી જડે તો મારી નણંદબઈને આપું
ભાણેજને ધોતિયાં ઓઢાડું
ઓ સહિયરો મારી, ટીલડી રે મારી નેણાંમાં રહે છે.
આ તો મારી હતી ને મને રે જડી
નણંદબઈને ક્યાંથી રે આલું
ઓ સહિયરો મારી, ટીલડી રે મારી નેણાંમાં રહે છે.
(અસારવામાં કુબેરપુરાની ભીલ સમુદાયની બહેનોએ આ ગીત સંભળાવ્યું. આ ભીલો ડીસા અને મારવાડની સરહદ ઉપરના હોઈ તેઓ ગાય ત્યારે થોડી મારવાડી હલક પણ આવે છે.)
સ્રોત
- પુસ્તક : ગુજરાતી લોકસાહિત્યમાળા – મણકો– ૨ (પૃષ્ઠ ક્રમાંક 27)
- સંપાદક : ગુજરાત લોકસાહિત્ય સમિતિ (ઉમાશંકર જોશી, પુષ્કર ચંદરવાકર, સુધા દેસાઇ, મંજુલાલ ર. મજમૂદાર, મધુભાઈ પટેલ, લાલચંદ ધૂળાભાઈ નીનામા, શિવશંકર પ્રાણલાલ શુક્લ
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1959