રેખ્તા
હિન્દવી
સૂફીનામા
રાજસ્થાની
સોખ્યના કારણિયે પરણ્યો કડલાં રે લાયો
sokhyna karaniye paranyo kaDlan re layo
સોખ્યના કારણિયે પરણ્યો કડલાં રે લાયો,
અમારા કારણિયે કાંય ના લાયો રે, કેસરીઓ લાલ;
અમારી ઉપરથી નજરું ઉતરી જઈ રે.
આયેલીને કારણિયે પરણ્યો કાંબિયું રે લાયો,
અમારે કારણિયે કાંય ના લાયો રે, કેસરિયો લાલ;
અમારી ઉપરથી દલડું ઉતરી જીયું રે.
લાયેલીને કારણિયે પરણ્યો ઘમચોરું લાયો,
અમારે કારણિયે કાંય ના લાયો રે, કેસરિયો લાલ;
અમારી ઉપરતી મનડું ઉતરી જીયું રે.
સોખ્યના કારણિયે પરણ્યો અમરવેલી લાયો,
અમારે કારણિયે ફાટેલ ગાભો રે, કેસરિયો લાલ;
અમારી ઉપરથી મીઠપું ઉતરી જીયું રે.
માનેતીને કારણિયે પરણ્યો ફૂલેલાં ફૂલ લાયો,
અમારે કારણિયે ધતૂરા ફૂલ રે, કેસરિયો લાલ;
અમારી પરથી વાલપ વઈ જઈ રે.
માનેતીને મો’લે પરણ્યો રાત દિ’ જાતો રે.
અમારી ઝૂંપડીયે ઘોર અંધારાં રે, કેસરિયો લાલ;
અમારી ઉપર નજરું ઓછી થઈ રે.
લાયેલીને નિત નિત લેર્યુ ને લેરખડાં,
અમારે રોવાનું રાતે પાણીડે રે, કેસરીયો લાલ;
અમારી આંખ્યુંમાં ઝાંખ્યું આઈ રે.
સ્રોત
- પુસ્તક : ગુજરાતી લોકસાહિત્યમાળા – મણકો– ૫ (પૃષ્ઠ ક્રમાંક 251)
- સંપાદક : ગુજરાત લોકસાહિત્ય સમિતિ (મંજુલાલ ર. મજમૂદાર, બચુભાઈ રાવત, મનુભાઈ જોધાણી, પદ્મશ્રી દુલાભાઈ કાગ, મેરૂભા ગઢવી, પુષ્કર ચંદરવાકર, ચન્દ્રકાન્ત વાઘેલા, કનૈયાલાલ જોશી, પ્રહ્લાદ ચી. પરીખ, નિરંજન સરકાર.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1966