shankar bhilDi - Lokgeeto | RekhtaGujarati

શંકર ભીલડી

shankar bhilDi

શંકર ભીલડી

આસન ઊગ્યા દાભ, મહાદેવજી, આસન ઊગ્યા દાભ રે,

સુગરીએ માળો ઘાલીઓ, તમે હરિ બોલો જી.

કોણ તમારી જાત ભીલીરાણી, કોણ તમારી જાત રે?

તમે કોના વિયોગે વન ભમો? તમે હરિ બોલો જી.

ભીલ અમારી જાત મહાદેવજી, ભીલ અમારી જાત રે,

અમે ભીલને વિયોગે વન ભમીએ, તમે હરિ બોલોજી.

ભીલને વહેતો મેલ ભીલીરાણી, ભીલને વહેતો મેલ રે,

તું કર મહાદેવનો સંગ તમે હરી બોલો જી.

અવળા બોલ ન બોલો મહાદેવજી, અવળા બોલ ન બોલો જી રે.

મારો ખીજ્યો ભીલ તને મારશે, તમે હરિ બોલો જી.

ભીલની અવળી રીત મહાદેવજી, ભીલની અવળી રીત રે,

નર નાચે ને નારી રીઝવે, તમે હરિ બોલો જી.

સોના આવરણો હાથ મહાદેવજી, સોના સાવરણો હાથ રે;

થેઈ થેઈ કરી મહાદેવજી નાચ્યા, તમે હરિ બોલો જી.

તમારે ઘેર, બે નાર મહાદેવજી, તમારે ઘેર બે નાર રે,

ત્રીજી તે ભીલડીને શું કરો? તમે હરિ બોલો જી.

ગંગા વળાવું કૈલાસ, ભીલીરાણી, ગંગા વળાવું કૈલાસ રે,

પારવતી તો પાણી ભરી લાવશે, તમે હરિ બોલો જી.

પારવતીએ રૂપ પ્રકાશ્યું, ત્યારે લાજ્યા શંભુ નાથ રે,

ત્યારે લાજ્યા ભોળાનાથ રે, તમે હરિ બોલો જી.

સ્રોત

  • પુસ્તક : ગુજરાતી લોકસાહિત્યમાળા – મણકો– ૯ (પૃષ્ઠ ક્રમાંક 225)
  • સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસા ઈ, પી. સી. પરીખ, કસ્તુરી નાનુભાઈ જોધાણી)
  • પ્રકાશક : ગુજરાત લોકસાહિત્ય સમિતિ, અમદાવાદ
  • વર્ષ : 1968