નહિ જાઉં સાસરે

ઘરને પછવાડે લીલી લીંબડી રે, ત્યાં છૂટી છે ઘોડી રોઝડી રે;

ઘોડીએથી સસરોજી ઉતર્યા રે, આજ મારે આણલાં આવિયાં રે;

દાદા મોરા આણલિયાં ન વારો રે, પરથમને આણે નહીં જાઉં સાસરે.;

ઘરને પછવાડે લીલી લીંબડી રે, ત્યાં છૂટી છે ઘોડી રોઝડી રે;

ઘોડીએથી જેઠજી ઉતર્યા રે, આજ મારે આણલાં આવિયાં રે;

કાકા મોરા આણલિયાં ન વારો રે, બીજેને આણે નહીં જાઉ સાસરે.

ઘરને પછવાડે લીલી લીંબડી રે, ત્યાં છૂટી છે ઘોડી રોઝડી રે;

ઘોડીએથી દેરજી ઉતર્યા રે, આજ મારે આણલાં આવિયાં રે;

વીરા મોરા આણલિયાં ન વારો રે, ત્રીજેને આણે નહીં જાઉં સાસરે.

ઘરને પછવાડે લીલી લીંબડી રે, ત્યાં છૂટી છે ઘોડી રોઝડી રે;

ઘોડીએથી ઉતર્યા પરણ્યોજી, આજ મારે આણલાં આવિયાં રે;

મામા મોરા આણલિયાં હવે વારો રે, અમારે જાવું છે હવે સાસરે.

પુસ્તક : ગુજરાતી લોકસાહિત્યમાળા – મણકો– 7 (પૃષ્ઠ ક્રમાંક 45)
સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસાઈ, પી. સી. પરીખ. હરિલાલ કા. મોઢા.
પ્રકાશક : ગુજરાત લોકસાહિત્ય સમિતિ, અમદાવાદ
વર્ષ : 1968

nahi jaun sasre