રેખ્તા
હિન્દવી
સૂફીનામા
રાજસ્થાની
રામ વનવાસ
ram wanwas
ઉતરખંડમાં અજોઘા એક નગરી રે,
તિંયા રાજા દશરથ કરે રાજ રે;
ગરબી ગાયેં તો રૂડા રામની રે.
રાજા દશરથને ત્રણ છે રાણિયું રે,
કેગે, કૌશલ્યા, ને સુમિત્રા છે નામ રે;
ગરબી ગાયેં તો રૂડા રામની રે.
રાજા દશરથને ચાર ચાર બેટડા રે,
ભરત, શતરૂઘન, લખમણ, ને રામ રે;
ગરબી ગાયેં તો રૂડા રામની રે.
રાજા દશરથનો અંગુઠો પાકિયો રે,
એના અંગુઠામાં અતિ ઘણાં દુઃખ રે;
ગરબી ગાયેં તો રૂડા રામની રે.
રાણીને મુખે અંગુઠો, રાજા પોઢિયા રે,
અંગુઠો ફૂટ્યો છે અધમધ રાત રે;
ગરબી ગાયેં તો રૂડા રામની રે.
રાણી કૌશલ્યા કોગરો કરવા નીસર્યાં રે,
કેગેયેં લીધો અંગુઠો મુખમાંય રે;
ગરબી ગાયેં તો રાજા રામની રે.
અંગુઠો ફૂટ્યો, ને દશરથ જાગિયા રે,
માગો માગો રાણીજી વચન રે;
ગરબી ગાયેં તો રાજા રામની રે.
માગું માગું વચન રાજા, એટલું રે,
ભરતને રાજ, રામ જાય વનવાસ રે;
ગરબી ગાયેં તો રાજા રામની રે.
લાવો કાગર, ને કરીએ ચીઠડી રે,
ચીઠી ચોડિયે ડેલી ને દરબાર રે;
ગરબી ગાયેં તો રાજા રામની રે.
એના હાટે રૂવે છે હાટ-વાણિયા રે,
એના ચોરે રૂવે છે ચારણ-ભાટ રે,
ગરબી ગાયેં તો રૂડા રામની રે.
એનાં ઘોડાં રૂવે છે ઘોડારમાં રે,
એના હાથી રૂવે દરબાર રે;
ગરબી ગાયેં તો રાજા રામની રે.
એની રાણી રૂવે રંગમો’લમાં રે,
એની દાસી રૂવે દરબાર રે;
ગરબી ગાયેં તો રાજા રામની રે.
એની માતા રૂવે છે ખોબે પાણિયે રે,
એનો દાદો રૂવે છે દરબાર રે;
ગરબી ગાયેં તો રાજા રામની રે.
રામે કાળો તી પોસાંગ પે’રિયો રે,
રામે લીધી છે વનની વાટ રે;
ગરબી ગાયેં તો રાજા રામની રે.
સ્રોત
- પુસ્તક : ગુજરાતી લોકસાહિત્યમાળા – મણકો– ૯ (પૃષ્ઠ ક્રમાંક 39)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસાઈ, પી. સી. પરીખ. હરિલાલ કાળીદાસ મોઢા.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968