રેખ્તા
હિન્દવી
સૂફીનામા
રાજસ્થાની
ટીલડી
tilDi
ચોડી કપાળે ટીલડી રે લોલ,
સેંથે પૂર્યો છે સિંદોર રે;
છોડી પિયરને બેની હાલિયાં રે લોલ!
ઓઢી કસુંબલ બાંધણી રે લોલ,
ચંપા પટારી જડી કોર રે;
ખોળે શ્રીફળ ને બેની હાલિયાં રે લોલ!
‘હો’ કેતાં હૈયું ગળગળું રે લોલ,
હીબકે ફરકે છે હોઠ રે;
છોડી પિયરને બેની હાલિયાં રે લોલ!
માતા ને બેન છાની રાખતાં રે લોલ,
ઘેલડિયાં એવાં ન થવાય રે;
સૌને જાવું છે સૈયર સાસરે રે લોલ!
પાદર મોઝાર ગાડાં છુટિયાં રે લોલ,
લાડકડીને પાણીલાં પાય રે;
નેણલે નીર તો વછુટિયાં રે લોલ!
સાસુ સસરા તારા મોવડી રે લોલ,
દેરાણી જેઠાણી કેરી જોડ્ય રે;
સંપીને રે’જે મારી લાડકી રે લોલ!
દેરીડાને વીર સમો માનજે રે લોલ,
નણદી છે નાનેરૂં બાળ રે;
હરખેથી એને હુલાવજે રે લોલ!
સાસુયેં ગુણ બધા વીસર્યા રે લોલ,
નણંદ કેરો થાય ધમરોળ રે;
દેરીડો આજ મારે દો’યલો રે લોલ!
અડધી રાતેં ગોરી ઊઠિયાં રે લોલ,
ઊડો જાગોને મારા કંથ રે;
કરવી કરમની મારે વાતડી રે લોલ!
ખોટા બોલી, ને તું છે ખોલકી રે લોલ.
નાની નકટી, ને નઘરોળ રે;
નથી રે સાંભળવી તારી વાતડી રે લોલ!
કે’તો ઓળાવું તને પિયરિયે રે લોલ,
કે’તો કાઢું તને ઘરની બાર રે;
આ રે ઘરમાં તું અળખામણી રે લોલ!
મૈયરનાં સુખ મારે શું કામનાં રે લોલ?
સાસરામાં સળગી જાણે જાઉં રે;
ઝરઝર કરતાં બેની જળી ગયાં રે લોલ!
સ્રોત
- પુસ્તક : ગુજરાતી લોકસાહિત્યમાળા – મણકો– ૯ (પૃષ્ઠ ક્રમાંક 21)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસાઈ, પી. સી. પરીખ. હરિલાલ કાળીદાસ મોઢા.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968