રેખ્તા
હિન્દવી
સૂફીનામા
રાજસ્થાની
કરમદડી
karamadDi
હું તો કરમદ વીંણવા ગઈ’તી રાજ કરમદડી;
મેં તો પાલી કરમદ વીણ્યાં, રાજ કરમદડી.
મેં તો ઘંટી ઉપર મેલ્યાં, રાજ કરમદડી;
ત્યાં તો નાના દેરીડે દીઠાં, રાજ કરમદડી.
મારાં પાલી કરમદ ઢોળ્યાં, રાજ કરમદડી;
બાઈજી, વારો છે કે વારું, રાજ કરમદડી.
મેં તો ઢીંકા ભેળો ઢાળ્યો, રાજ કરમદડી;
મેં તો પાટુ ભેળો પાડ્યો, રાજ કરમદડી.
મેં તો બેવડી રાશે બાંધ્યો, રાજ કરમદડી;
ત્યાં તો સાસુડી આવી દોડી, રાજ કરમદડી.
વહુ, ફાટ્ય ઘણેરી રાખો, રાજ કરમદડી;
મને બે ચાર પાટુ મારી, રાજ કરમદડી.
તારા ધણી ને તેડાવું, રાજ કરમદડી;
તને પિયરીએ વળાવું, રાજ કરમદડી.
ધણી સાંજ પડીને ઘરે આવ્યો, રાજ કરમદડી;
મારી બાઈજીએ માંડી વાત, રાજ કરમદડી;
ધણી રીસ ભરેલો દોડ્યો, રાજ કરમદડી.
મને બે ચાર ઢીંકા માર્યા, રાજ કરમડી;
મને પડખાની પાટુ મારી, રાજ કરમદડી;
મને બેવડી રાશે મારી, રાજ કરમદડી;
મને પરોણલે આગળ હાંકી, રાજ કરમદડી.
મને પિયરીએ વળાવી, રાજ કરમદડી.
સ્રોત
- પુસ્તક : ગુજરાતી લોકસાહિત્યમાળા – મણકો– ૯ (પૃષ્ઠ ક્રમાંક 282)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસા ઈ, પી. સી. પરીખ, ચંદ્રિકા જોધાણી)
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968