રેખ્તા
હિન્દવી
સૂફીનામા
રાજસ્થાની
કેર કાંટો
ker kanto
હાં કે રાજ!
વાવડીનાં પાણી ભરવા ગ્યાં’તાં,
મને કેર કાંટો વાગ્યો.
હાં કે રાજ!
વડોદરાના વૈદડાને તેડાવો,
મારા કાંટડીયા કઢાવો,
મને પાટડીઆ બંધાવો;
મને કેર કાંટો વાગ્યો.
હાં કે રાજ!
ધોરાજીના ઢોલિયા મંગાવો,
માથે પાથરણાં પથરાવો;
મને કેર કાંટો વાગ્યો.
હાં કે રાજ!
ચરમાંથી રાંધણિયાં કઢાવો,
મારી ઘુંવાડે દુઃખે આંખ્યો;
મને કેર કાંટો વાગ્યો.
હાં કે રાજ!
ઘરમાંથી ઘંટિયું કઢાવો,
મારાં ધડકે માંથા ચમકે;
મને કેર કાંટો વાગ્યો.
હાં કે રાજ!
ઘરમાંથી ખાંડણીઓ કઢાવો,
મારા ધબકે ખંભા દુઃખે;
મને કેર કાંટો વાગ્યો.
હાં રે રાજ!
આંગણીએથી ગાવડિયું કઢાવો;
એના ધમ્મર વલોણાં સોતી
મને કેર કાંટો વાગ્યો.
હાં કે રાજ!
સાસુડીને તિરથ કરવા મેલો,
એના નાનાં છોરૂડાં સોતી;
મને કેર કાંટો વાગ્યો.
હાં કે રાજ!
સસરાને ચોવટ કરવા મેલો,
મને રોજ ઘુંઘટડા કઢાવે;
મને કેર કાંટો વાગ્યો.
હાં કે રાજ!
નણદડીને સાસરીએ વળાવો,
એના બાંધ્યા બચકા સોતી;
મને કેર કાંટો વાગ્યો.
હાં કે રાજ!
ફળિયામાંથી પાડોશણને કાઢો,
એના તે રેંટયા સોતી;
મને કેર કાંટો વાગ્યો.
સ્રોત
- પુસ્તક : ગુજરાતી લોકસાહિત્યમાળા – મણકો– ૯ (પૃષ્ઠ ક્રમાંક 287)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસા ઈ, પી. સી. પરીખ, ચંદ્રિકા જોધાણી)
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968