રેખ્તા
હિન્દવી
સૂફીનામા
રાજસ્થાની
બીજડું
bijaDun
આબુગઢથી રમતું રે આયું, વાડામાં વવરાયું રે,
એ રે બીજડિયું ફાલ્યું-ફૂલ્યું લચકા રે લોળ રે;
ભઈનું રોપેલ બીજડું, ભોજાઈનું સીંચેલ બીજડું.
એ રે બીજડીએ ફળ એક આયું, વાડ્યે વે’લે હાલ્યું રે,
એ રે બીજડિયાનું ફળ રે રુપાળું, રાતું-કાળું બીબલિયું રે,
ભઈનું રોપેલ બીજડું, ભોજઈનું સીંચેલ બીજડું.
એ રે બીજડિયાને પીલ્યું-પલાળ્યું, તેલ નવટાંચ કાઢ્યું રે,
એ રે તેલડિયે સોંદડી ઝબોળી, ઘાઘરડે છંટાયાં રે,
ભઈનું રોપેલ બીજડું, ભોજઈનું સીંચેલ બીજડું.
જોજો જોજો રે નણદલડીના વીરા, સોદંડી કેરો રંગ રે;
ભઈનું રોપેલ બીજડું, ભોજઈનું સીંચેલ બીજડું.
જો જો જોજો રે નણદલડીના વીરા, ઘાઘરડા કેરા રૂપ રે;
ભઈનું રોપેલ બીજડું, ભોજઈનું સીંચેલ બીજડું.
પાટણથી બે પહોળા મંગાયાં સૂરજ શેરની સોંદડી રે,
વીર ઓળાવે એની બેનડી, ભોજઈ કઢાવે નણંદડી;
ભઈનું રોપેલ બીજડું, ભોજઈનું સીંચેલું બીજડું.
વનરાવનથી વેલ્ય મંગાઈ, ઘોઘા તે શે’રની ઘુઘરી રે,
વીર ઓળાવે એની બેનડી, ભોજઈ કઢાવે નણંદડી;
ભઈનું રોપેલ બીજડું, ભોજઈનું સીંચેલ બીજડું.
હાંહલપરથી હાંહડી મંગાઈ, કડી શે’રનાં કડલાં રે,
વીર ઓળાવે એની બેનડી, ભોજઈ કઢાવે નણંદડી;
ભઈનું રોપેલ બીજડું, ભોજઈનું સીંચેલ બીજડું.
નણદી ઓળાયાં ને ભોજઈ હરખાયાં, હવે તો ઠીક ફાયું રે,
ભઈનું રોપેલ બીજડું, ભોજઈનું સીંચેલ બીજડું.
આ ગીત સાણંદ તાલુકાના સોયલ ગામના શ્રી. કશ્યાભાઈએ ગાઈ સંભળાવેલ આ ગીત છે.
સ્રોત
- પુસ્તક : ગુજરાતી લોકસાહિત્યમાળા – મણકો– ૯ (પૃષ્ઠ ક્રમાંક 133)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસા ઈ, પી. સી. પરીખ, પુરષોત્તમ સોલંકી)
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968