રેખ્તા
હિન્દવી
સૂફીનામા
રાજસ્થાની
આશાભંગ
ashabhang
જામનગરની મારી ચૂંદડી;
ઓઢીશ ઓઢીશ વાર તહેવાર રે;
જ્યારે જાશું રે નગર સાસરે.
આવતાં આણાં રે બાનાં અટકિયાં,
ન જોયાં સાસરીઆનાં સુખ રે;
ના રે ગિયાં રે નગર સાસરે.
ના રે રોપ્યા રે મોટા માંડવા,
નથી ધડૂક્યા આંગણિયે ઢોલ રે;
ના રે ગિયાં રે નગર સાસરે.
નથી બેઠાં રે લગનને માયરે,
નથી જોયાં પિયુડાનાં રૂપ રે;
ના રે ગિયાં રે નગર સાસરે.
ના રે ચડ્યા રે ચિતરેલ ચોરીએ,
નથી બાંધ્યા હાથે મીંઢોળ રે;
ના રે ગિયા રે નગર સાસરે.
ના રે જોયા રે ઉંચા બંગલા,
નથી જોઈ રૂડી સાસર વેલ રે;
ના રે ગિયાં રે નગર સાસરે.
પરણ્યા પહેલાં સોનલબાઈ ચાલિયાં,
જીવતાં લીધી મરણ કેરી વાટ રે;
ના રે ગિયાં રે નગર સાસરે.
પંથે પિયુજી એના પરવર્યા,
સોનલ જાતી સરગને ઘાટ રે;
ના રે ગિયાં રે નગર સાસરે.
ઈ રે ચુંદલડી તણી સોડમાં,
સામી ઠાંસી સાળુડાની સોડ રે;
ના રે ગિયાં રે નગર સાસરે.
સોનલા વરણી તો બાની ચેહ બળે,
ઉપર ઊડે અબીલ ગુલાલ રે;
ના રે ગિયાં રે નગર સાસરે.
સ્રોત
- પુસ્તક : ગુજરાતી લોકસાહિત્યમાળા – મણકો– ૯ (પૃષ્ઠ ક્રમાંક 285)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસા ઈ, પી. સી. પરીખ, ચંદ્રિકા જોધાણી)
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968