રેખ્તા
હિન્દવી
સૂફીનામા
રાજસ્થાની
પીર રામદેવજી
peer ramdewji
અરે પીર રામદેવજી, મારે ઘેર આવો પરોણલા રે – દેવ રામ.
શાં શાં બેસણ દેશ રે – પીર રામદેવજી
સોનાને હીંડોળે રણુજામાં દીવા બળે – પીર
પોંખણ ગઢના પીર રણુજામાં દીવો બળે – પીર
અરે પીર રામદેવજી, સાંગા તે માચી હીરે ભરી,
સોનાને હીંડોળે રણુજામાં દીવા બળે – પીર
અરે પીર રામદેવજી, મારે ઘેર આવો પરોણલા રે – દેવ રામ.
શાં શાં તે દાતણ દઈશ રે પીર રામદેવજી
પીતળ લોટા જળે ભર્યા – પીર (2)
શાં શાં તે ઝીલણ દઈશ રે પીર રામદેવજી
તાંબા તે કૂંડીઓ જળે ભરી – પીર
હીરકોરી ધોતિયાં દઈશ રે – પીર
અરે પીર રામદેવજી, મારે ઘેર આવો પરોણલા રે – દેવ રામ.
શાં શાં ભોજન દઈશ રે પીર રામદેવજી
સેવ સુંવાળી લાવસી પીર રામદેવજી
ખોબલે પીરસી ખાંડ રે પીર રામદેવજી
અરે પીર રામદેવજી, મારે ઘેર આવો પરોણલા રે – દેવ રામ.
શાં શાં મુખવાસ દઈશ રે – પીર
લવિંગ સોપારી એલચી રે – પીર
અરે પીર રામદેવજી, મારે ઘેર આવો પરોણલા રે – દેવ રામ.
(નરોડા રોડપર મ્યુનિસિપાલિટીના ભંગી (વાલ્મીકિ) ક્વાર્ટર્સ પાસે આવેલ ગોરધનની ચાલીનાં વણકર સમુદાયની બહેન માણેકમાએ આ ગીત સંભળાવ્યું ને ગરબે ઘૂમતી બહેનોને ગવડાવ્યું.)
સ્રોત
- પુસ્તક : ગુજરાતી લોકસાહિત્યમાળા – મણકો– ૨ (પૃષ્ઠ ક્રમાંક 37)
- સંપાદક : ગુજરાત લોકસાહિત્ય સમિતિ (ઉમાશંકર જોશી, પુષ્કર ચંદરવાકર, સુધા દેસાઇ, મંજુલાલ ર. મજમૂદાર, મધુભાઈ પટેલ, લાલચંદ ધૂળાભાઈ નીનામા, શિવશંકર પ્રાણલાલ શુક્લ
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1959