રેખ્તા
હિન્દવી
સૂફીનામા
રાજસ્થાની
મેં તો દાતણ ડો’ળીને
mein to datan Do’line
મેં તો દાતણ ડો’ળીને વડ રોપિયો,
વડ ફાલ્યો છે ગોળ-ગમીર;
લીલા હો ગિરધારી!
મારા ગામના કુંભારીને વીરો કરું,
મારો ગરબો ભલેરો ધડી આલ;
લીલા હો ગિરધારી! મેં તો.
મારા ગામના સુતારીને વીરો કરું,
મારો ગરબો ભલેરો કોરી આલ;
લીલા હો ગિરધારી! મેં તો.
મારા ગામના લવારીને વીરો કરું,
મારો ગરબો ભલેરો જડી આલ;
લીલા હો ગિરધારી! મેં તો.
મારા ગામના બજારીને વીરો કરું,
મારા ગરબે દીવેટો લાય;
લીલા હો ગિરધારી! મેં તો.
મારા ગામના ઘાંચીડાને વીરો કરું,
મારા ગરબે તેલડાં પૂર;
લીલા હો ગિરધારી! મેં તો.
મારા ગામના પટોલીને દાદો કરું,
મારા ગરબે ચોચીઓ મેલાય;
લીલા હો ગિરધારી! મેં તો.
મારા ગામના ઘૈડેરાંને દાદો કરું,
મારો ગરબો ભલેરો વખાણ;
લીલા હો ગિરધારી! મેં તો.
મારા ગામની દીચરીઓને બેની કરું,
મારો ગરબો ભલેરો ગવરાવ;
લીલા હો ગિરધારી! મેં તો.
મારા ગામની વહુવારુને ભાંજાઈ કરું,
મારો ગરબો ભલેરો રમાડ;
લીલા હો ગિરધારી! મેં તો.
સ્રોત
- પુસ્તક : ગુજરાતી લોકસાહિત્યમાળા – મણકો–1 (પૃષ્ઠ ક્રમાંક 265)
- સંપાદક : ગુજરાત લોકસાહિત્ય સમિતિ (ઉમાશંકર જોશી, પુષ્કર ચંદરવાકર, સુધા દેસાઇ, મંજુલાલ ર. મજમૂદાર, મધુભાઈ પટેલ, લાલચંદ ધૂળાભાઈ નીનામા, માધવ મો. ચૌધરી
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1957