મારી માડીના બારણે મોગરો

મારી માડીના બારણે મોગરો, હું તો ફુલડાં વીણતી રમું રે;

રાજ, મારી માડીના ઘર કેમ વીસરું?

મારી સાસુના બારણે બાવળીયો, હું તો કાંટા વીણતી રડું રે;

રાજ, મારી માડીના ઘર કેમ વીસરું?

મારી માતાની બારણે હીંચકો, હું તો હીંચકા ગાતી રમું રે;

રાજ, મારી માડીના ઘર કેમ વીસરું?

મારા સાસરાને બારણે ખાંડણિયો, હું તો ચોખા ખાંડતી રડું રે;

રાજ, મારી માડીના ઘર કેમ વીસરું?

મારી બેનીના વાળ્યા ચોટલા રે, તેમાં પાંચ પાંચ ફૂલડાં ઘાલ્યાં રે;

રાજ, મારી માડીના ઘર કેમ વીસરું?

મારી નણંદના વાળ્યા ચોટલા રે, એમાં પાંચ પાંચ વિછુડા ઘાલ્યા રે;

રાજ, મારી માડીના ઘર કેમ વીસરું?

મારી માતાએ શીરો શેક્યો રે, તેમાં ઘીની રેલમ છેલ રે;

રાજ, મારી માડીના ઘર કેમ વીસરું?

મારી સાસુએ શીરો શેક્યો રે, તેમાં દિવેલની રેલમ છેલ રે;

રાજ, મારી માડીના ઘર કેમ વીસરું?

પુસ્તક : ગુજરાતી લોકસાહિત્યમાળા – મણકો– ૫ (પૃષ્ઠ ક્રમાંક 182)
સંપાદક : ગુજરાત લોકસાહિત્ય સમિતિ (મંજુલાલ ર. મજમૂદાર, બચુભાઈ રાવત, મનુભાઈ જોધાણી, પદ્મશ્રી દુલાભાઈ કાગ, મેરૂભા ગઢવી, પુષ્કર ચંદરવાકર, ચન્દ્રકાન્ત વાઘેલા, કનૈયાલાલ જોશી, પ્રહ્લાદ ચી. પરીખ, વસંત જોધાની.
પ્રકાશક : ગુજરાત લોકસાહિત્ય સમિતિ, અમદાવાદ
વર્ષ : 1966

mari maDina barne mogro