મે તો હોંસે બનાવ્યા પતળવેલિયા

મે તો હોંસે બનાવ્યા પતળવેલિયા રે, લોલ !

મે તો ક્યી બેનને બાફવા બોલાવિયા રે, લોલ !

મે તો ગીતાબેનને બાફવા બોલાવિયા રે, લોલ !

એણે બાફ્યાનો ન રાખ્યો સુમાર—મે તો.

મેં તો ક્યી વોવ ને ચાખવા બોલાવ્યા રે, લોલ !

મે તો અરૂણાબેનને ચાખવા બોલાવ્યા રે, લોલ !

એણે ચાખ્યાનો ન રાખ્યો સુમાર—મે તો.

અર્ધી રાતે તે પેટમાં દુખિયા રે, લોલ !

મહેશભાઈએ તે દાકતર બોલાવિયા રે, લોલ !

દાકતરે આપ્યો મીઠાનો જુલાબ—મે તો.

પુસ્તક : ગુજરાતી લોકસાહિત્યમાળા – મણકો– ૩ (પૃષ્ઠ ક્રમાંક 88)
સંપાદક : ગુજરાત લોકસાહિત્ય સમિતિ (ધૂમકેતુ, પુષ્કર ચંદરવાકર, સુધા દેસાઇ, મંજુલાલ ર. મજમૂદાર, મધુભાઈ પટેલ, લાલચંદ ધૂળાભાઈ નીનામા, કનૈયાલાલ જોશી, કુસુમબેન ધીરુભાઈ મહેતા, સુધાબેન ધીરુભાઈ મહેતા, અનિલાબહેન ધીરુભાઈ મહેતા
પ્રકાશક : ગુજરાત લોકસાહિત્ય સમિતિ, અમદાવાદ
વર્ષ : 1963

mae to honse banawya patalweliya