રેખ્તા
હિન્દવી
સૂફીનામા
રાજસ્થાની
મા કુંવારકાનો મેળો
ma kunwarkano melo
મા કુંવારકાનો મેળો, પામરિએ રઢ લાજી,
મારો પૈણોજી મેળે જ્યા’તા, પામરિએ રઢ લાજી;
લાયા લાયા પામરિયુંની જોડ્યું, પામરિએ રઢ લાજી,
લીલી પીળી પામરિયુંની જોડ્યું, પામરિએ રઢ લાજી.
તમે માઢમાં તે દરજીડા બેહાડો, પામરિએ રઢ લાજી,
મારો લીલુડો કમખો સીવાડો, પામરિએ રઢ લાજી;
સમી શે’રના તે સોનીડા તેડાવો, પામરિએ રઢ લાજી
સાચા સોનાની ઘૂઘરી ઘડાવો, પામરિએ રઢ લાજી
વે’લી વણઝારણ બોલાવો, પામરિએ રઢ લાજી;
ઝેણી ખાપુને હીરથી ગોંથાવો, પામરિએ રઢ લાજી
ઉપર મોરલની ભાત્યું મઢાવો, પામરિએ રઢ લાજી
એને ફરતાં તે ફોમતાં મેલાવો, પામરિએ રઢ લાજી
મારા કમખાની કોંહમાં બાંધો, પામરિએ રઢ લાજી;
હું તો પેરીને પાણીડાં જઈ’તી, પામરિએ રઢ લાજી
મારો પૈણોજી થઈ ગયા રાજી, પામરિએ રઢ લાજી
વીસનગર તરફની આંજણાબહેનો પાસેથી સાંભળેલું આ ગીત છે.
સ્રોત
- પુસ્તક : ગુજરાતી લોકસાહિત્યમાળા – મણકો– ૫ (પૃષ્ઠ ક્રમાંક 278)
- સંપાદક : ગુજરાત લોકસાહિત્ય સમિતિ (મંજુલાલ ર. મજમૂદાર, બચુભાઈ રાવત, મનુભાઈ જોધાણી, પદ્મશ્રી દુલાભાઈ કાગ, મેરૂભા ગઢવી, પુષ્કર ચંદરવાકર, ચન્દ્રકાન્ત વાઘેલા, કનૈયાલાલ જોશી, પ્રહ્લાદ ચી. પરીખ, નિરંજન સરકાર.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1966