રેખ્તા
હિન્દવી
સૂફીનામા
રાજસ્થાની
લેરિયું
leriyun
મારું રૂડું રંગાવેલ લેરિયું રે,
એમાં પાડી કસુંબલ ભાત; મારી નણદી માગે છે લેરિયું રે.
હું લેરિયું પે’રીને પાણી સાંચરી રે,
મને પૂછે છે નગરીનાં લોક; ક્યાંનું રંગાવેલ લેરિયું રે?
મારા દાદાનું લીધેલ લેરિયું રે,
મારી માતાની પાડેલ ભાત; મારી નણદી માગે છે લેરિયું રે.
મારું રૂડું રંગાવેલ લેરિયું રે,
એમાં પાડી કસુંબલ ભાત; મારી નણદી માગે છે લેરિયું રે.
હું તો ઓઢી પે’રીને પાણી સાંચરી રે,
મને પૂછે નગરીનાં લોક; છોરી ક્યાંનું રંગાવેલ લેરિયું રે?
મારા કાકાનું લીધેલ લેરિયું રે,
મારી કાકીની પાડેલ ભાત; મારી નણદી માગે છે લેરિયું રે.
મારૂં રૂડું રંગાવેલ લેરિયું રે,
એમાં પાડી કસુંબલ ભાત; મારી નણદી માગે છે લેરિયું રે.
હું તો ઓઢી પે’રીને પાણી સાંચરી રે,
મને પૂછે નગરીનાં લોક; છોરી ક્યાંનું રંગાવેલ લેરિયું રે?
મારા વીરાનું લીધેલ લેરિયું રે.
મારી ભાભીની પાડેલ ભાત; મારી નણદી માગે છે લેરિયું રે.
મારૂં રૂડું રંગાવેલ લેરિયું રે,
એમાં પાડી કસુંબલ ભાત; મારી નણદી માગે છે લેરિયું રે.
હું તો ઓઢી પે’રીને પાણી સાંચરી રે,
મને પૂછે છે નગરીનાં લોક; છોરી ક્યાંનું રંગાવેલ લેરિયું રે?
મારા મામાનું લીધેલ લેરિયું રે,
મારી મામીની પાડેલ ભાત; મારી નણદી માગે છે લેરિયું રે.
સ્રોત
- પુસ્તક : ગુજરાતી લોકસાહિત્યમાળા – મણકો– 7 (પૃષ્ઠ ક્રમાંક 13)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસાઈ, પી. સી. પરીખ. હરિલાલ કા. મોઢા.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968