રેખ્તા
હિન્દવી
સૂફીનામા
રાજસ્થાની
લાલજીના મહિના
laljina mahina
લાલજી! કારતક મહિને રથ જાદવરાયે જોતર્યા
ઓ લાલ, વહેલા આવજો હો લાલ!
લાલજી! માગશર મહિને મેલી મથુરા ગયા
ઓ લાલ, વહેલા આવજો હો લાલ!
લાલજી! પોષ મહિને પોપટ બેઠો પાંજરે
ઓ લાલ, વહેલા આવજો હો લાલ!
લાલજી! મહા મહિનાની સેજલડી સૂની પડી
ઓ લાલ, વહેલા આવજો હો લાલ!
લાલજી! ફાગણ મહિને કેસૂડો રંગ ઘોળિયો
ઓ લાલ, વહેલા આવજો હો લાલ!
લાલજી! ચૈતર મહિને ચતુરભુજ ચાઈલા ચાકરી
ઓ લાલ, વહેલા આવજો હો લાલ!
લાલજી! વૈશાખ મહિને વાયે હીંડોળા ઝૂલતા
ઓ લાલ, વહેલા આવજો હો લાલ!
લાલજી! જેઠ મહિને જગજીવન ઘેર આવિયા
ઓ લાલ, વહેલા આવજો હો લાલ!
લાલજી! અષાઢ મહિને અબળાને સુખ આપજો
ઓ લાલ, વહેલા આવજો હો લાલ!
લાલજી! શ્રાવણ મહિને સરવડેથી વરસિયો
ઓ લાલ, વહેલા આવજો હો લાલ!
લાલજી! ભાદરવો ભલ પેરે ગાજિયો
ઓ લાલ, વહેલા આવજો હો લાલ!
લાલજી! આસો મહિને દિવાળી ભલ આવિયાં
ઓ લાલ, વહેલા આવજો હો લાલ!
લાલજી! ફૂલવાડીમાં રંગીન બાવળ લાકડાં
ઓ લાલ, વહેલા આવજો હો લાલ!
લાલજી! તેની ઘડાવું નવરંગ પાવડીઓ
ઓ લાલ, વહેલા આવજો હો લાલ!
લાલજી! પાવડીઓ પહેરીને મારે મો’લે આવજો
ઓ લાલ, વહેલા આવજો હો લાલ!
લાલજી! પાવડીઓથી રડ્યાખડ્યા તો ભલે પડ્યા
ઓ લાલ, વહેલા આવજો હો લાલ!
લાલજી! બળતીજળતી બોલું છું પણ ઘણી ખમા
ઓ લાલ, વહેલા આવજો હો લાલ!
સ્રોત
- પુસ્તક : ગુજરાતી લોકસાહિત્યમાળા – મણકો–1 (પૃષ્ઠ ક્રમાંક 333)
- સંપાદક : ગુજરાત લોકસાહિત્ય સમિતિ (ઉમાશંકર જોશી, પુષ્કર ચંદરવાકર, સુધા દેસાઇ, મંજુલાલ ર. મજમૂદાર, મધુભાઈ પટેલ, લાલચંદ ધૂળાભાઈ નીનામા.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1957