રતનબા ચાંદાનું ચાંદરડું

રતનબા ચાંદાનું ચાંદરડું રે

માવસંગ જમઈ વગડાનું વાંદરડું રે

રતનબા પાણીડાં જીયાં’તાં રે

માવસંગ જમઈ પખાલી થઈને જીયા’તા રે

જમઈડે બહુ રે કલપના કીધી

ત્યારે અમે દેવકન્યા દીધી.

રતનબા નિશાળે ભણવાને જીયાં’તાં.

માવસંગ જમઈ માસ્તર થઈને ગ્યાતા.

રતનબા મોટરમાં ફરવાને જીયાં’તાં.

માવસંગ જમઈ ડ્રાઈવર થઈને જીયા’તા.

જમઈડે બહુ રે કલપના કીધી

ઇંગ્લિશમાં માતાને કે’છે મધર, મધર મધર કરે ને

લોક હસાવે રે

બે બયુની જાનમાં રસ નાવે.

ઇંગ્લિશમાં બાપાને કે’છે ફાધર, ફાધર ફાધર કરે ને

લોક હસાવે રે

મારે માંડવે રે રસ રે રસ આવે.

પુસ્તક : ગુજરાતી લોકસાહિત્યમાળા – મણકો– ૨ (પૃષ્ઠ ક્રમાંક 127)
સંપાદક : ગુજરાત લોકસાહિત્ય સમિતિ (ઉમાશંકર જોશી, પુષ્કર ચંદરવાકર, સુધા દેસાઇ, મંજુલાલ ર. મજમૂદાર, મધુભાઈ પટેલ, લાલચંદ ધૂળાભાઈ નીનામા, જોરાવરસિંહ જાદવ.
પ્રકાશક : ગુજરાત લોકસાહિત્ય સમિતિ, અમદાવાદ
વર્ષ : 1959

ratanba chandanun chandaraDun