રેખ્તા
હિન્દવી
સૂફીનામા
રાજસ્થાની
પાનવાડીમાં દીપડો
panwaDiman dipDo
પાનવાડીમાં દીપડો, નથુ પાનવાડીમાં દીપડો;
ભાણી ને ભાણેજ રુએ રજપૂતીયા.
આપણા શેઢા સાચવે, નથુ શેઢા સાચવે;
રેંધાની વાડ શેઢા સાચવે રજપૂતીયા.
ધારું ધાન છે, નથુ ધારું ધાન;
ધાનની પછવાડે આવી સૂતો રજપૂતીયા.
બાર બાર બંધુકું, નથુ બાર બાર બંધુકું;
તેરહેં તલવારે દીપડો મારવો રજપૂતીયા.
તારી માતા વારે, નથુ તારી માતા વારે;
તારો દાદો વારે, નથુ તારો દાદો વારે;
બેટા દીપાને નથી મારવો રજપૂતીયા.
આંધળા માબાપ છે, નથુ આંધળા માબાપ;
આંધળાની દોલત ના આવી રજપૂતીયા.
બારહેં બંધુક છે, નથુ બારહેં બંધુક;
તે રહેં તલવારે દીપડો મારવો રજપૂતીયા.
ઉગમણો મેડો, નથુ ઉગમણો મેડો;
આથમણા બારના તારા પડદા રજપૂતીયા.
નીતરતી જોઈ તારી લાશ રે રજપૂતીયા,
આંધળા માતાની દોલત ન આવી રજપૂતીયા;
તારો બાંધવ રોવે, દીપા તારો બાંધવ રોવે;
સમણે બાંધવ ભાંગી રજપૂતીયા.
પરદેશી બોન છે, વીરા પરદેશી બોન છે;
પરદેશણ બોલ ભેળા નો થ્યા રજપૂતીયા.
ભાણેજ રોવે, દીપા ભાણેજ રોવે;
મારે મામાના પડ્યા કાલ રજપૂતીયા.
હાટે હડતાલ છે, દીપા હાટે હડતાલ છે;
બજારે ડાયરા રુવે રજપૂતીયા.
રેડીયા કહુંબા, દીપા રેડીયા કહુંબા;
રેડીયા કહુંબા ઊંધા પડીયા રજપૂતીયા.
સ્રોત
- પુસ્તક : ગુજરાતી લોકસાહિત્યમાળા – મણકો– ૪ (પૃષ્ઠ ક્રમાંક 52)
- સંપાદક : ગુજરાત લોકસાહિત્ય સમિતિ (ધૂમકેતુ, મંજુલાલ ર. મજમૂદાર, પુષ્કર ચંદરવાકર, સુધા રમણલાલ દેસાઇ, મધુભાઈ પટેલ, કનૈયાલાલ જોશી, પદ્મજા ચંદરવાકર.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1964