રેખ્તા
હિન્દવી
સૂફીનામા
રાજસ્થાની
કોણ વડું?
kon waDun?
ધનદા, પહેલું તે કુળમાં કોણ વડું?
ધનદા, એક બ્રહ્મા ને બીજા વિષ્ણુ :
સભા રંગ જીત્યા પાંડવો.
ધનદા, બ્રહ્માએ તે સૃષ્ટિ રચાવેલી,
ધનદા, વિષ્ણુએ તો મેલેલા અંશ :
સભા રંગ જીત્યા પાંડવો.
ધનદા, બીજું તે કુળમાં કોણ વડું?
ધનડા, એક આભ અને બીજી ધરતી :
સભા રંગ જીત્યા પાંડવો.
ધનદા, આભે તે મેહુલા વરસાવિયા,
ધનદા, ધરતીએ તો ઝીલેલાં નીર :
સભા રંગ જીત્યા પાંડવો.
ધનદા, ત્રીજું તે કુળમાં કોણ વડું?
ધનદા, એક માતા ને બીજા તાત :
સભા રંગ જીત્યા પાંડવો.
ધનદા, માતાએ તો જનમ ધરાવીઓ,
ધનદા, તાતે તે લડાવેલા લાડ :
સભા રંગ જીત્યા પાંડવો.
ધનદા, ચોથું તે કુળમાં કોણ વડું?
ધનદા, એક સાસુ ને બીજા સસરા :
સભા રંગ જીત્યા પાંડવો.
ધનદા, સાસુએ તે ભરથાર સોંપીઆ,
ધનદા, સસરાની તો આપેલી લાજ :
સભા રંગ જીત્યા પાંડવો.
ધનદા, પાંચમું તે કુળમાં કોણ વડું?
ધનદા, એક દંત ને બીજા કંથ :
સભા રંગ જીત્યા પાંડવો.
ધનદા, દંતના તો ચુડીલા વે’રાવીઆ,
ધનદા, કંથના તો સોળ શણગાર :
સભા રંગ જીત્યા પાંડવો.
સ્રોત
- પુસ્તક : ગુજરાતી લોકસાહિત્યમાળા – મણકો– ૯ (પૃષ્ઠ ક્રમાંક 275)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસા ઈ, પી. સી. પરીખ, ચંદ્રિકા જોધાણી)
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968