રેખ્તા
હિન્દવી
સૂફીનામા
રાજસ્થાની
જશોદાના જાયા, તમને વિનવું રે
jashodana jaya, tamne winawun re
જશોદાના જાયા, તમને વિનવું રે;
વસુ-દેવકીના જન્મેલ: તમે ગાયું ચોરોને ગોવાળિયા રે.
વાલે હાથે તે વાછરૂ છોડિયાં રે;
લઈ ચાલ્યા વૃન્દાવન ઘાટ; સામી મળી વ્રજવનિતા રે.
મારી વાછડીની ડોકે ફૂમતા રે;
તમે સાચવજો દીનાનાથ: એને સાંજ પડ્યે સંભાળજો રે.
ગોપી, કઠણ વચન નવ બોલીએ રે;
નાણું નથી બંધાવતી ગાંઠ: વાળી લેને તારાં વાછરૂં રે.
બાવા નંદજીને કે’દિ હતી બાકરી રે;
તમને ગાળ્યું ખાવાની ઘણી ટેવ: વગડે દોવો ધેનું પારકી રે.
ગોપી, તારી તે ગાય તારા લખણી રે;
આપ ધાવે પોતાનાં દૂધ: સામી આળ ચડાવે અમને રે.
ભલા મારી તે ગાય મારા ઘરની રે;
લખણ શીખી તમારી પાસ: તમે ગાયું ચારોને ગોવાળિયા રે.
વન વેઠતાં તે જસ જડ્યો આવડો રે;
જસ ગાયો પાણીને પૂર: તમે ગાયું ચારોને ગોવાળિયા રે.
વાલા, જસનો ઘડાવું એક ટોકરો રે;
બાંધું બેવડ બળદની રાશ: જેનો રણકો વાગે ત્રણ લોકમાં રે.
જસોદાના જાયા એક વિનતી રે;
અમને ફરી રમાડો રાસ: પછી ગાયો ચારોને ગોવાળિયા રે.
સ્રોત
- પુસ્તક : ગુજરાતી લોકસાહિત્યમાળા – મણકો– ૫ (પૃષ્ઠ ક્રમાંક 187)
- સંપાદક : ગુજરાત લોકસાહિત્ય સમિતિ (મંજુલાલ ર. મજમૂદાર, બચુભાઈ રાવત, મનુભાઈ જોધાણી, પદ્મશ્રી દુલાભાઈ કાગ, મેરૂભા ગઢવી, પુષ્કર ચંદરવાકર, ચન્દ્રકાન્ત વાઘેલા, કનૈયાલાલ જોશી, પ્રહ્લાદ ચી. પરીખ, વસંત જોધાણી.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1966