રેખ્તા
હિન્દવી
સૂફીનામા
રાજસ્થાની
રાણકદેવડીનું લોકગીત
ranakdewDinun lokgit
વાગ્યા વાગ્યા રે કાંઈ જાંગીના ઢોલ રે :
રાજાને ઘેર કુંવરી અવતર્યા—!
તેડાવો તેડાવો કોઈ જાણતલ જોશી રે :
કુંવરીના જોશ જોવડાવજો—
“પહેલો વાસો એના દાદાને ભારે રે :
બીજો વાસો એના મોસાળને—
ત્રીજો વાસો એના કાકાને ભારે રે :
ચોથો વાસો રે એની કાકીને—
પાંચમો વાસો રે એના વીરાને ભારે રે :
છઠ્ઠો વાસો રે એની ભાભીને—”
“મંગાવો મંગાવો કાંઈ દમણનાં ચીર રે :
કુંવરીને ભોમાં ભંડારિયે—”
ઓઝો ઓઝી કાંઈ ધૂડ ખોદવા જાય રે :
ધૂડ ખોદતાં રે બાળક લાધિયાં :
“ઘેલી ઓઝી! બાળક ખંખેરી લેજે રે :
વાંઝિયાં મેહેણાં રે આપણાં ભાગિયાં!”
“ઘેલા ઓઝા ઘેલડિયાં શાં બોલો રે?:
થાન વિનાનાં બાળક નહિ ઉઝરે—”
“લેજે લેજે કાંઈ સતીકેરાં નામ રે:
ટચલી આંગળિયે ધાવણ છૂટશે—”
લીધાં લીધાં સતી કેરાં નામ રે:
ટચલી આંગળિયે ધાવણ છૂટિયાં!—
ઓઝો ઓઝી બાળક લેઈ ઘેર આવ્યાં રે:
ઘેર જઈને રે ઝાંપા દઈ દીધા!—
ઘોડલી છૂટી રે કાંઈ, રાજાની છટી રે:
ઓઝાને ઘેરે રે ઘોડી જઈ ચઢી—
ઘોડલી હાંકી રે કાંઈ ઓઝાની કુંવરી રે:
કંકુના થાપા રે પડી રહ્યા!
“ઘેલા ઓઝા રે! કાંઈ ઝાંપલિયા ઉઘેડ રે:
તારી રે કુંવરીનાં માગાં આવિયાં—”
“ઘેલા રાજા! ઘેલડિયાં શાં બોલો રે:?
તમે રે રાજાને અમે દુભિયા!
પરણે પરણે રે કાંઈ રા’,ને ખેંગાર રે:
રાણામાં પરણે રે રાણકદેવડી—
સ્રોત
- પુસ્તક : ગુજરાતી લોકસાહિત્યમાળા – મણકો– ૩ (પૃષ્ઠ ક્રમાંક 9)
- સંપાદક : ગુજરાત લોકસાહિત્ય સમિતિ (ધૂમકેતુ, પુષ્કર ચંદરવાકર, સુધા દેસાઇ, મંજુલાલ ર. મજમૂદાર, મધુભાઈ પટેલ, લાલચંદ ધૂળાભાઈ નીનામા, કનૈયાલાલ જોશી.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1963