રેખ્તા
હિન્દવી
સૂફીનામા
રાજસ્થાની
મલ્લારરાવનો ગરબો
mallarrawno garbo
શહેરનો સૂબો તે ક્યારે આવશે રે?
(ઢાળ : ‘લીપ્યું ને ગુંપ્યું મારૂં આંગણું રે’)
શહેરનો સૂબો તે ક્યારે આવશે રે?
દાતણ કરતા જાવ રે, મલ્લારરાવ!
શહેરનો સૂબો તે ક્યારે આવશે રે?
દાતણ કરશું વાડિયે રે : ફરતી ફીરંગીની ફોજ રે: મલ્લારરાવ! શહેરનો.
ચીની તે પ્યાલા તેલે ભર્યા રે : મર્દન કરતા જાવ રે: મલ્લારરાવ! શહેરનો.
મર્દન કરશું વાડિયે રે : ફરતી ફીરંગીની ફોજ રે: મલ્લારરાવ! શહેરનો.
તાંબા તે કુંડીઓ જળે ભરી રે : ના’વણ કરતા જાવ રે : મલ્લારરાવ! શહેરનો.
ના’વણ કરશું વાડિયે રે : ફરતી ફીરંગીની ફોજ રે : મલ્લારરાવ! શહેરનો.
રાંધી રસોઈઓ પડી રહી રે : ભોજન કરતા જાવ રે : મલ્લારરાવ! શહેરનો.
ભોજન કરશું વાડિયે રે : ફરતી ફીરંગીની ફોજ રે : મલ્લારરાવ! શહેરનો.
પાન સોપારી એલચી રે : મુખવાસ કરતા જાવ રે : મલ્લારરાવ! શહેરનો.
મુખવાસ કરશું વાડિયે રે : ફરતી ફીરંગીની ફોજ રે : મલ્લારરાવ! શહેરનો.
સોના તે કેરાં સોગઠાં રે : રમત રમતા જાવ રે : મલ્લારરાવ! શહેરનો.
રમત રમશું વાડિયે રે : ફરતી ફીરંગીની ફોજ રે : મલ્લારરાવ! શહેરનો.
ઢીંચણ સમાણો ઢોલિયો રે : પોઢણ કરતા જાવ રે : મલ્લારરાવ! શહેરનો.
પોઢણ કરશું વાડિયે રે : ફરતી ફીરંગીની ફોજ રે : મલ્લારરાવ! શહેરનો.
ક્યાંથી આવ્યા પીટ્યા જાંગલ રે? : માથે ટોપીને ભૂરો દરવેશરે : મલ્લારરાવ! શહેરનો.
શહેર છોડી સૂબો નીસર્યો રે : લીધી મદ્રાસની વાટ રે : મલ્લારરાવ! શહેરનો.
રાણી રુવે રંગમહેલમાં રે : દાસીઓ રુવે દરબાર રે : મલ્લારરાવ! શહેરનો.
હાટે રુવે હાટવાણિયા રે : ચોરે રુવે ચારણ ભાટ રે : મલ્લારરાવ! શહેરનો.
વડોદરાના મહારાજા મલ્હારરાવ ગાયકવાડનો તા. 22 એપ્રિલ 1875ને દિવસે પદભ્રષ્ટ કર્યા હતા. તે પ્રસંગે વડોદરાની પ્રજામાં જે ખળભળાટ ફેલાયો હતો એ ક્રાન્તિકારી તથા કરુણ પ્રસંગે આ ગરબાને જન્મ આપ્યો છે. ‘ગમે તેવો પણ આપણો રાજા’—એવી રાજભક્તિ લોકહૃદયમાં વસેલી છે : તેનો આવીર્ભાવ અહીં થવા પામ્યો છે.
સ્રોત
- પુસ્તક : ગુજરાતી લોકસાહિત્યમાળા – મણકો– ૩ (પૃષ્ઠ ક્રમાંક 7)
- સંપાદક : ગુજરાત લોકસાહિત્ય સમિતિ ( ધૂમકેતુ, પુષ્કર ચંદરવાકર, મંજુલાલ ર. મજમૂદાર, સુધા દેસાઇ, લાલચંદ ધૂળાભાઈ નીનામા, મધુભાઈ પટેલ, કનૈયાલાલ જોશી.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1963