રેખ્તા
હિન્દવી
સૂફીનામા
રાજસ્થાની
કેદી બન્યો ભૂપાળ
kedi banyo bhupal
કેદી બન્યો ભૂપાળ, મલારરાવ કેદી બન્યો રે :
લાગી પકડતાં ન વાર, મલારરાવ કેદી બન્યો રે— ટેક
સંવત ઓગણીસેં એકત્રીસ પોસ માસ ગુરૂવાર :
શુક્લ પક્ષની સાતમે, જો ને ઝાલ્યો ઝટ, અસવાર—મલારરાવ. 1
મલના આવ્યા મહીપતિ, બેસી સુંદર વેહેલ :
પકડ્યો તેને એક પલકમાં, ત્યારે પામ્યો જવા ના ઘેર—મલારરાવ. 2
કીધો કાંપમાં કેદ ને, જપત કર્યું ઘરબાર :
પાય મૂકે નહીં કોઈને, એ તો કોણ કરે વેહેવાર—મલારરાવ. 3
દુવાઈ ફરી અંગરેજની, થરથર ધ્રૂજે લોક :
થશે હવે શું રાયનું, સઉ પામ્યા અતીશે શોક—મલારરાવ. 4
રાણી બે રૂદન કરે, સુના કમાબાઈ સોત :
કરે પ્રાર્થના ઈશની, હવે આપો હમારૂં મોત—મલારરાવ. 5
આવ્યા વિપ્ર દેશ પરદેશના, બેઠા કરે સહુ જપ :
ધ્યાન ધરે જુગદીશનું, જાણે કાલે છૂટી જશે નૃપ—મલારરાવ. 6
કહે મલારરાવ વાંક શો, કીધો મુજને કેદ : ?
કર જોડી કહે કરગરી, મને ખોલી બતાવોની ભેદ—મલારરાવ. 7
સર લુઈસ પેલી કહે, કીધો રાય તમે કેર :
સરબતમાં ઘોલી કરી, તમે પાયું કરનલને ઝેર—મલારરાવ. 8
કરનલ ફેર રાણીતણો, રેસીડેન્ટ સરદાર :
તેને હણવા કારણે, તમે લેશ કરી નહીં વાર—મલારરાવ. 9
મલારરાવ વિસ્મય થઈ, બોલીઓ દીન વચન. :
નથી ખબર એ મુજને, મારૂં બહુ રે બળે છે મન—મલારરાવ. 10
સર લુઈસ પેલી કહે, ન્યાય થશે પવિત્ર :
નહીં કરશો ચિંતા કદી, તમે ધીરજ રખો મિત્ર—મલારરાવ. 11
ભરૂચમાં બન્યો સરી, આ ગરબો રસાલ :
ઓચિંતો તે લઈ ગયા, જોને મદ્રાસમાં ભૂપાલ—મલારરાવ. 12
સ્રોત
- પુસ્તક : ગુજરાતી લોકસાહિત્યમાળા – મણકો– ૩ (પૃષ્ઠ ક્રમાંક 8)
- સંપાદક : ગુજરાત લોકસાહિત્ય સમિતિ (ધૂમકેતુ, પુષ્કર ચંદરવાકર, સુધા દેસાઇ, મંજુલાલ ર. મજમૂદાર, મધુભાઈ પટેલ, લાલચંદ ધૂળાભાઈ નીનામા, કનૈયાલાલ જોશી.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1963