રેખ્તા
હિન્દવી
સૂફીનામા
રાજસ્થાની
હરણી ને વ્યાધ
harni ne wyaadh
સરગે ભવનથી ઊતરી એક હૈણી, ન
વા’લા, આયી શ સંસારિયા મોજર રે;
હૈણી ચારો ચારતી, રટતી હો રામ...
હૈણી હર હર બોલતી હો રામ...સરગે.
હરતો ફરતો એક પારધીડો આયો, ન
વા’લા, હૈણી દેખી ને પાસો વાળિયો હો રામ;
હૈણી ચારો ચરતી, રટતી હો રામ...
હૈણી હર હર બોલતી હો રામ...સરગે.
ઘરે આયી ન મૂરખે હથિયાર લીધાં, ન
વા’લા, હૈણી ન મારવા ચાલ્યો હો રામ
હૈણી ચારો ચરતી, રટતી હો રામ...
હૈણી હર હર બોલતી હો રામ... સરગે.
પેલી દશથી ખડક્યો પાહલો, ન
વા’લા, બીજી દશથી સાંધ્યાં બાણ હો રામ;
હૈણી ચારો ચરતી, રટતી હો રામ...
હૈણી હર હર બોલતી હો રામ... સરગે.
તીજી દશથી હળગાઈ શે આગ ન
વા’લા, ચોથી દશે મેલ્યો શવાન હો રામ;
હૈણી ચારો ચરતી, રટતી હો રામ...
હૈણી હર હર બોલતી હો રામ... સરગે.
ચાર દવાર મૂરખે બંધ કરિયાં, ન
વા’લા હૈણી રોળાય વગડામાંય હો રામ;
હૈણી ચારો ચરતી, રટતી હો રામ...
હૈણી હર હર બોલતી હો રામ... સરગે.
નઈ રે મામા, ને નઈં મોસાળ, ન
વાલા, નઈં રે માડીજાયો વીર હો રામ;
હૈણી ચારો ચરતી, રટતી હો રામ...
હૈણી હર હર બોલતી હો રામ... સરગે.
ઓત્તર દશથી ચડી એક વાદળી, ન
વાલા, ઝરમર વરસ્યા ઝેણા મે’ હો રામ;
હૈણી ચારો ચરતી, રટતી હો રામ...
હૈણી હર હર બોલતી હો રામ... સરગે.
વાધુ ચડ્યું વગડાની વચમાં, ન
વા’લા, બાણ વાજ્યું શવાનને શરીર હો રામ;
હૈણી ચારો ચરતી, રટતી હો રામ...
હૈણી હર હર બોલતી હો રામ... સરગે.
પેપળાના પોલથી નેંકળ્યો કાળુળો, ન
વાલા, જઈ ડસિયો પારધીડે પગ, હો રામ;
હૈણી ચારો ચરતી, રટતી હો રામ...
હૈણી હર હર બોલતી હો રામ... સરગે.
આગ ઓલાણી, મરાણો એનો શવાન, ન
વાલા, પારધીડાના પલમાં જ્યાશ પરાણ, હો રામ;
હૈણી ચારો ચરતી, રટતી હો રામ...
હૈણી હર હર બોલતી હો રામ... સરગે.
ઓચીંતાના રે પવન ઊઠિયા, ન
વાલા, પાહલો ઉડાડ્યો અંગાશ હો, રામ;
હૈણી ચારો ચરતી, રટતી હો રામ...
હૈણી હર હર બોલતી હો રામ... સરગે.
ચારે ય દવારા વા’લે ખોલિયા, ન
વા’લા, હૈણી મા’લે વનડા માંય હો રામ;
હૈણી ચારો ચરતી, રટતી હો રામ...
હૈણી હર હર બોલતી હો રામ... સરગે.
હૈણી ઊડી શ સરગે મા’લતી, ન
વા’લા, અંગાશે તારલા મંડાયા હો રામ;
હૈણી ચારો ચરતી, રટતી હો રામ...
હૈણી હર હર બોલતી હો રામ... સરગે.
ગાય, શીખે, ને કોઈ સાંભળે, ન
વા’લા વેકુંઠ હશે એનો વાસ હો રામ;
હૈણી ચારો ચરતી, રટતી હો રામ...
હૈણી હર હર બોલતી હો રામ... સરગે.
સ્રોત
- પુસ્તક : ગુજરાતી લોકસાહિત્યમાળા – મણકો– ૯ (પૃષ્ઠ ક્રમાંક 118)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસા ઈ, પી. સી. પરીખ, પુરષોત્તમ સોલંકી)
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968