halun utawri - Lokgeeto | RekhtaGujarati

હાલું ઉતાવરી

halun utawri

હાલું ઉતાવરી

હેલ ભરી હાલું ઉતાવરી રે, હૈડે હરખ માય,

મારે ઘેર મે’માન આવ્યાં;

મે’માન આવ્યાં તો ભલેં રે આવ્યાં, કે’ દીની જોતી’તી વાટ,

મારે ઘેર મે’માન આવ્યાં;

મે’માનને ઉતારા ઓરડા રે, સાયબાને મેડીનો મોલ,

મારે ઘેર મે’માન આવ્યાં.

હેલ ભરી હાલું ઉતાવરી રે, હૈડે હરખ માય,

મારે ઘર મે’માન આવ્યાં;

મે’માન આવ્યાં તો ભલે રે આવ્યાં કે’ દીની જોતી’તી વાટ,

મારે ઘેર મે’માન આવ્યાં;

મે’માનને દાતણ દાડમી રે, સાયબાને કણેરી કાંબ્ય,

મારે ઘેર મે’માન આવ્યાં.

હેલ ભરી હાલું ઉતાવરી રે, હૈડે હરખ માય,

મારે ઘેર મે’માન આવ્યાં.

મે’માન આવ્યાં તો ભલે રે આવ્યાં, કે’ દીની જોતી’તી વાટ,

મારે ઘેર મે’માન આવ્યાં;

મે’માનને નાવણ કુંડિયો રે, સાયબાને નદીનાં નીર,

મારે ઘેર મે’માન આવ્યાં.

હેલ ભરી હાલું ઉતાવરી રે, હૈડે હરખ માય,

મારે ઘેર મે’માન આવ્યાં;

મે’માન આવ્યાં તો ભલેં રે આવ્યાં, કે દીની જોતી’તી વાટ,

મારે ઘેર મે’માન આવ્યાં;

મે’માનને ભોજન લાપસી રે, સાયબાને કઢિયેલાં દૂધ,

મારે ઘેર મે’માન આવ્યાં.

હેલ ભરી હાલું ઉતાવરી રે, હૈડે હરખ માય,

મારે ઘેર મે’માન આવ્યાં;

મે’માન આવ્યાં તો ભલેં રે આવ્યાં, કે દીની જોતી’તી વાટ,

મારે ઘેર મે’માન આવ્યાં;

મે’માનને મુખવાસ એલચી રે, સાયબાને પાન પચાસ

મારે ઘેર મે’માન આવ્યાં.

સ્રોત

  • પુસ્તક : ગુજરાતી લોકસાહિત્યમાળા – મણકો– 7 (પૃષ્ઠ ક્રમાંક 31)
  • સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસાઈ, પી. સી. પરીખ. હરિલાલ કા. મોઢા.
  • પ્રકાશક : ગુજરાત લોકસાહિત્ય સમિતિ, અમદાવાદ
  • વર્ષ : 1968