કાનુડો ગોવાળીઓને

કાનુડો ગોવાળીઓને નવ લક્ષ ગાય,

એક વાળે ત્યાં બીજી નાશી નાશી જાય. 1

ગાય ચારવાને માતા,

જાવું પેલે તીર !

બૂડવા બીહું રે,

આડાં આવે જમના નીર. 2

વાઘને સિંહ,

વન વાંદર વીંછી ઘણા !

ભો રે લાગે છે મા !

મને ભોરીંગ તણા ! 3

તેરે દેખીને મારી

ત્રાઠી છે રે ગાય.

એક વાળું, ત્યાં

બીજી નાશી નાશી જાય. 4

એકલો નહીં ચારવા

જાઉં મોરી માય

બળભદ્ર ભાઈને સંગાથે

મોકલોને માય— 5

આથમતી વેળાનાં

નદીએ આવે છે પૂર.

રાત અંધારી માત

મારે થાય છે અસૂર—6

હું રે નાનડીઓ માતા,

ન વળે રે ગાય.

એક વાળું ત્યાં

બીજી નાશી નાશી જાય— 7

તું રે નાનડી બાળા,

મોટાં તારા શૂર

હિરણકશ્યપ તેં

માર્યો મોટો ભૂપ—8

પાતાળ પેશીને

શેષ નાગ હણ્યો

ત્યારે બૂડવાનો ભો;

તેં શેં વન ગણ્યો !! 9

હાલ્ય...

પુસ્તક : ગુજરાતી લોકસાહિત્યમાળા – મણકો– ૩ (પૃષ્ઠ ક્રમાંક 162)
સંપાદક : ગુજરાત લોકસાહિત્ય સમિતિ (ધૂમકેતુ, પુષ્કર ચંદરવાકર, સુધા દેસાઇ, મંજુલાલ ર. મજમૂદાર, મધુભાઈ પટેલ, લાલચંદ ધૂળાભાઈ નીનામા, કનૈયાલાલ જોશી, મનોરમાબહેન ભટ્ટ
પ્રકાશક : ગુજરાત લોકસાહિત્ય સમિતિ, અમદાવાદ
વર્ષ : 1963

kanuDo gowalione