ગોકુળ આઠમનો જન્મ થયો ને

ગોકુળ આઠમનો જન્મ થયો ને,

પડદે રમ્યા મહારાજ,

લોક આવીને ઊભા રહ્યા પછી,

આવતા રહ્યા ભગવાન.

બાળકને હાલરડું વહાલું.

સોના-રૂપાનું મારું ઘોડિયું ને,

હીરલા દોરી હાથ,

એક હીંચકડો નાંખજે રે બાઈ,

કા’નાને રળિયાત! બાળકને. 2

કા’ન તમારો ઘેલડો ને,

રુએ છે જાણી જાણી,

છાનો રે’ છોકરા! સૂઈ જા! તારી

માતાજી ગ્યાં છે પાણી. બાળકને. 3

પાણી ભરી માતા મદભર્યાં આવ્યાં,

ઊને જળે નવરાવ્યા,

સારા રૂમાલમાં વીંટાળી પછી,

ઉરમાં લઈ ધવરાવ્યા. બાળકને. 4

જમે છે બ્રાહ્મણ ચૂરમે ને,

ખોબલે પિરસાવી ખાંડ,

ખભા ઝાલીને ઊભાં રહ્યાં પછી,

કોડે વીંધાવ્યા કાન. બાળકને. 5

સાચી સિવડાવું ઝૂલડી ને,

માથે સોનેરી ટોપી,

ખોઈ ભરાવું ખારેકની પછી,

જોવા આવે વ્રજગોપી.

બાળકને હાલરડું વહાલું!! 6

રસપ્રદ તથ્યો

હાલરડામાં પ્રત્યેક કડીને છેડે ‘ઓળોળોળો હાલ્ય...હાલાં’ બોલવાનું હોય છે. (છાપતી વખતે એ રાખ્યું નથી.)

પુસ્તક : ગુજરાતી લોકસાહિત્યમાળા – મણકો– ૨ (પૃષ્ઠ ક્રમાંક 14)
સંપાદક : ગુજરાત લોકસાહિત્ય સમિતિ (ઉમાશંકર જોશી, પુષ્કર ચંદરવાકર, સુધા દેસાઇ, મંજુલાલ ર. મજમૂદાર, મધુભાઈ પટેલ, લાલચંદ ધૂળાભાઈ નીનામા, ગજાનન વિ. જોશી
પ્રકાશક : ગુજરાત લોકસાહિત્ય સમિતિ, અમદાવાદ
વર્ષ : 1959

gokul athamno janm thayo ne