રેખ્તા
હિન્દવી
સૂફીનામા
રાજસ્થાની
ગુલાબડાળ
gulabDal
ઊભી ઊભી ગુલાબ ડાળ લટકે છે,
મને ઘડીક રમવા મેલો મા’રાજ;
ઊભી ઊભી ગુલાબ ડાળ લટકે છે.
મારા પગ પરમાણે કડલાં,
મારા કડલે રતન જડાવો મારાજ;
ઊભી ઊભી ગુલાબ ડાળ લટકે છે.
મને ઘડીક રમવા મેલો મારાજ; ઊભી...
મારા પગ પરમાણે ઝાંઝરિયાં,
ઝાંઝરિયે રતન જડાવો મા’રાજ;
ઊભી ઊભી ગુલાબ ડાળ લટકે છે.
મને ઘડીક રમવા મેલો મા’રાજ ઊભી...
મારા પગ પરમાણે કાંબિયું,
કાંબિયુંને રતન જડાવો મા’રાજ;
ઊભી ઊભી ગુલાબ ડાળ લટકે છે.
મને ઘડીક રમવા મેલો મા’રાજ; ઊભી...
મારી ડોક પરમાણે હાંસડી,
હાંસડીએ રતન જડાવો મા’રાજ;
ઊભી ઊભી ગુલાબ ડાળ લટકે છે.
મને ઘડીક રમવા મેલો મા’રાજ; ઊભી...
ઊભી ઊભી ગુલાબ ડાળ લટકે છે.
મને સૈયરુંમાં રમવા મે’લો મા’રાજ;
ઊભી ઊભી ગુલાબ ડાળ લટકે છે.
પગ પરમાણે મારે કડલાં રે જોયેં,
કાંબિયુની બબ્બે જોડ મા’રાજ; ઊભી...
ડોક પરમાણે મારે હાંસડી રે જોયે,
દાણિયાની બબ્બે જોડ મા’રાજ; ઊભી...
ઢોલક સાથે કુંડાળે પડી ગરબે ઘૂમતાં ગવાતું આ ગીત ધોળકાની બેનોના કંઠે સાંભળેલું છે.
સ્રોત
- પુસ્તક : ગુજરાતી લોકસાહિત્યમાળા – મણકો– ૯ (પૃષ્ઠ ક્રમાંક 109)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસા ઈ, પી. સી. પરીખ, પુરષોત્તમ સોલંકી)
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968