રેખ્તા
હિન્દવી
સૂફીનામા
રાજસ્થાની
નાનેરી શોક્ય
naneri shokya
ધોળો તે ઘોડો હંસલો, મોરા રાજ,
એનાં પિત્તળિયાં પલાણ રે; તમ સાથે નહિ બોલું.
સાવ સોનાનું મારૂં બેડલું, મોરા રાજ,
રૂપલા ઈંઢોણી હાથ રે; તમ સાથે નહિ બોલું.
સરોવર પાણીડાં સંચરી, મોરા રાજ,
સાંભળી કાંઈ અવનવી વાત રે; તમ સાથે નહિ બોલું.
કોણે કીધું ને કોણે સાંભળ્યું, મોરા રાજ,
કોણે ચલાવી છે વાત રે; તમ સાથે નહિ બોલું.
ચાંદે કહ્યું ને સૂરજે સાંભળ્યું, મોરા રાજ,
વાયે ચલાવી છે વાત રે; તમ સાથે નહિ બોલું.
શાને તે લગને સાયબા પરણશો મોરા રાજ,
ક્યારે ઊઘલશે જાન રે; તમ સાથે નહિ બોલું.
સાતમને લગને ગોરી પરણશું, મોરા રાજ,
છઠ્ઠે ઊઘલશું જોડી જાન રે; તમ સાથે નહિ બોલું.
શા રે વાંકે સાયબા પરણશો, મોરા રાજ,
શા રે વાંકે લાવશો શોક્ય રે; તમ સાથે નહિ બોલું.
તમારા રે પોંચા ગોરી શામળા, મોરા રાજ,
ગોરા પોંચાલિયાની ખાંત રે; તમ સાથે નહિ બોલું.
તમારી તે વેણી ગોરી ટૂંકડી, મોરા રાજ,
લાંબી વેણીની છે ખાંત રે; તમ સાથે નહિ બોલું.
તમારાં તે છોરૂ ગોરી ગોબરાં, મોરા રાજ,
ભેગા બેસારવાની ખાંત રે; તમ સાથે નહિ બોલું.
તમારાં તે મૈયર ગોરી વેગળાં, મોરા રાજ,
ઢુંકડા મૈયરિયાની ખાંત રે; તમ સાથે નહિ બોલું.
તમારે ને બાંધવ ગોરી એકલો, મોરા રાજ,
સાત સાળાની છે ખાંત રે; તમ સાથે નહિ બોલું.
પરણી સરજીને સાયબો આવીઆ, મોરા રાજ,
લાવ્યા નાનકડી શોક્ય રે; તમ સાથે નહિ બોલું.
ઊઠો ગોરી રે રસોઈ કરો, મોરા રાજ,
જમશે નાનેરી શોક્ય રે; તમ સાથે નહિ બોલું.
કોના જેવી ને કોના જેવડી, મોરા રાજ,
કોણ સરીખી છે શોક્ય રે; તમ સાથે નહિ બોલું.
તારા જેવી ને તારા જેવડી, મોરા રાજ,
જાણે તારી નાનેરી બેન રે; તમ સાથે નહિ બોલું.
વચ્ચે ભરાવે ઘરમાં ભીંતડું, મોરા રાજ,
ત્યાં રે’શે નાનેરી શોક્ય રે; તમ સાથે નહિ બોલું.
વચમાં મેલાવો સાયબા જાળિયાં, મોરા રાજ,
નિત નિત ધડાકા લઈશ રે; તમ સાથે નહિ બોલું.
સ્રોત
- પુસ્તક : ગુજરાતી લોકસાહિત્યમાળા – મણકો– ૭ (પૃષ્ઠ ક્રમાંક 133)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસાઈ, પી. સી. પરીખ, કંચન જોધાણી)
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968