રેખ્તા
હિન્દવી
સૂફીનામા
રાજસ્થાની
ગૌત્રાટ
gautrat
નગર સોહાગણો કરે રે ગૌત્રાટ;
કો’ મારા ગોરજી, કરું ગૌત્રાટ?
હું એ ના જાણું, બ્રહ્માનો બેટો;
તમારા સસરાને પૂછી કરો રે ગૌત્રાટ.
મંદિરેથી આવંતા ઓ દાદાજી;
કો’ મારા સસરાજી, કરું રે ગૌત્રાટ?
હું એ ના જાણું, મારા ઘરની વહુઆરુ;
તમારાં સાસુને પૂછી કરો રે ગૌત્રાટ.
રસોઈઓ રાંધતાં ઓ માતાજી;
કો’ મારાં સાસુજી, કરું રે ગૌત્રાટ?
હું એ ના જાણું, મારા ઘરની વહુઆરુ;
તમારા જેઠને પૂછી કરો રે ગૌત્રાટ.
હાટેથી આવંતા ઓ મોટેરા ભાઈ;
કો’ મારા જેઠજી, કરું રે ગૌત્રાટ?
હું એ ના જાણું, મારા ઘરની વહુઆરુ;
તમારાં જેઠાણીને પૂછી કરો રે ગૌત્રાટ.
બેટડો ધવરાવંતા, મારાં ભાભીજી;
કો’ મારાં જેઠાણી, કરું રે ગૌત્રાટ?
હું એ ના જાણું, મારા ઘરની વહુઆરુ;
આપણા દીઅરને પૂછી કરો રે ગૌત્રાટ.
ઘેડીલા ખેલાવતા ઓ ના’નાભાઈ?
કા’ મારા દીઅરજી, કરું રે ગૌત્રાટ?
હું એ ના જાણું, મારાં મોટેરાં ભોજાઈ;
તમારાં દેરાણીને પૂછી કરો રે ગૌત્રાટ.
પાણીડાં ભરંતાં ઓ વહુઆરુ;
કો’ તો દેરાણી, કરું તે ગોત્રાટ?
હું શું જાણું, હું તો નાનેરી વહુઆરુ;
આપણા નણદીને પૂછી કરો રે ગૌત્રાટ.
સાસરીએથી આવતાં ઓ મોટેરાં બેનડી;
કો’ મારાં નણદીજી, કરું રે ગૌત્રાટ?
હું એ ના જાણું, મારાં વા’લેરા ભોજાઈ;
તમારા નણદોઈને પૂછી કરો રે ગૌત્રાટ.
ખાસડાં ખાનારા ઓ રે જમાઈરાજ;
કો’ મારા નણદોઈજી, કરું રે ગૌત્રાટ?
હું શું જાણું, હું પરઘર કેરો બેટો;
મારા સાળાને પૂછી કરો રે ગૌત્રાટ.
ઢોલીએ પોઢંતા ઓ મોરા સ્વામી;
કો’ મારા ભરથાર, કરું રે ગૌત્રાટ?
લાખ ખરચું, ને બે લાખ ખરચું;
અપવાસ થાય તો ગોરી, કરો રે ગૌત્રાટ.
ગૌ + ત્રિરાત્ર. એ બે શબ્દો મળીને થયેલો ગૌત્રિરાતનું અપભ્રંશ ગૌત્રાટ છે.
સ્રોત
- પુસ્તક : ગુજરાતી લોકસાહિત્યમાળા – મણકો– ૯ (પૃષ્ઠ ક્રમાંક 297)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસા ઈ, પી. સી. પરીખ, કંચન જોધાણી)
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968